I giganti del mare
|
C'l artìcul chè 'l è scrit in
Miranduléś |
 The Wreck of the Mary Deare
| ||
| I giganti del mare | ||
 Cooper e Heston in na figùra dal film | ||
| I gigànt dal mâr 1959 | ||
|---|---|---|
| Regìa: Michael Anderson | ||
| Scritōr: Hammond Innes • Eric Ambler | ||
| Atōr: Gary Cooper • Charlton Heston • Ben Wright Michael Redgrave • Cecil Parker • Richard Harris Peter Illing • Emlyn Williams • Virginia McKenna | ||
| Müsica: George Duning | ||
| Léngua: Ingléś • Francéś | ||
| Dürä dal film: 105 minüt | ||
| Nasiōṅ: Stat Unî • Régn Unî | ||
I giganti del mare (I gigànt dal mâr) 'l è 'n film dramàtic americàṅ e britànic dal 1959 ad Michael Anderson trat da 'n rumànś 'd Hammond Innes.
La pelìcula la gh'iva da èsar giràda p'r Alfred Hitchcock che però a 'l ùltim 'l à decìś invéci 'd far Intrigo internazionale. Custâ dū migliòṅ e siē ad dòlar a 'l incìrca, al film al 'n à fat pò sù praticamènt àtar tant, giùst na cria da piò.
Sunt
Durànt na nòt ad timpèsta al marinàr John Sands (Charlton Heston), méntar 'l è drē a navigàr cun la sò barca batśàda La stria dal mâr vèrs Saint-Malo insém a i sò cumpàgn Mike (Ben Wright) e Frank (Terence de Marney), 'l incróśa na nâṿ dimóndi più granda dla sua che par pôc la n gh và adòs, la Mary Deare 'd Hong Kong, ch'la pâr bandunàda e ch'la gh'iva da purtàr di cumpunènt 'd aparéć a Anvèrsa.
John al gh mònta sù par védar cuś è sucès e 'l cata 'l capitàṅ Gideon Patch (Gary Cooper), ùltim óm d'l equipàǵ. Chi lò al gh diś 'd andàr via ma quànd al s rénd cònt ch'l è impusìbil par via dal cundisiòṅ dal mâr al gh parmét 'd armàgnar lè salvànd-ag la vita anc se purtròp la nâṿ l'è drē a impinìr-as 'd àqua da quànd, a sò dita, un sabutadōr al gh'à fat scupiàr dla dinamît dèntar. Gideon al decìd ad cur'r al risć ad stablìr la barca cónt'r al còsti predóśi dgl'ìśuli Minquiers, in dal Canàł dla Mandga, pò i dū i vìnan catâ in mèś a 'l mâr su na barca 'd salvatàǵ e purtâ in Bretàgna. Gideon al dmanda a John 'd a n dir gnint dla Mary Deare e 'd lasàr inténdar ch'la sia 'ndàda a fónd, almànc par soquànt dè. Da piò al n pōl minga dir ma 'l créd ch'a gh sia quèl sóta, un pat fra 'l tenènt Higgins (Richard Harris), imbarcâ sèg, e gl'armadōr dla nâṿ par ciapàr i bèsi dl'asicurasiòṅ dòp avēr vindû prima 'l càrag di mutōr a i cinéś.