Heavy Metal (film)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Heavy Metal
Heavy Metal (film).png
La Taarna in na figùra dal film
id.
1981
Scritōr: Charles Perrault
Regìa: Gerald Potterton • Jimmy T. Murakami
John Bruno • John Halas • Julian Harris
Barrie Nelson • Paul Sabella • Jack Stokes
Pino Van Lamsweerde • Harold Whitaker
Senegiadùra: Daniel Goldberg • Angus McKie
Len Blum • Dan O'Bannon • Bernie Wrightson
Richard Corben • Jean 'Moebius' Giraud
Personâǵ: Harry Canyon • Rudnick • Katherine
Norl • Ard • Taarak • Sternn • Gloria • Taarna
Mùśica: Elmer Bernstein
Durèda dal cartòun: 86 minût
Lengua: Ingléś
Nasiòun/Paēś: CànadaRégn Unî


«
Al futûr che ninsòṅ al v à mai cuntâ.»
(Tagline dal film)


Heavy Metal (id.) 'l è 'n film a cartòṅ animâ a epiśòdi dal 1981 ad Gerald Potterton ch'al ciàpa 'l nóm (Metàl Pēś) da na rivìsta americàna a fumét dimóndi famóśa in di an Stanta ch'la gh'iva dèntar dal stòri ch'i misćiàv'n insém pulp, fantasy e erutìśum. In dla culòna sunóra, curàda p'r Elmer Bernstein, i s càtan di pès hard rock e heavy metal di Blue Öyster Cult, Sammy Hagar e Black Sabbath.

La pelìcula, ch'la gh'à abû 'n séguit in dal 2000 da 'l tìtul Heavy Metal 2000, l'à muciâ sù da piò ad vint migliòṅ ad dòlar dòp ès'r-an custâ nóṿ e tri.

Sunt

'L astrunàuta Grimaldi al tórna su la Tèra tut cuntènt ad védar sò fiōla pìcula. Sicûr ad purtàr un bèl rigàl dènt'r a la sò valìś, al gh cata invéci na bòcia 'd luś vérda ciamàda Loc-Nar ch'la 'l masa faghénd-al dvintàr pólvra. La bòcia la cònta a la putìna tut al ròbi catìvi ch'l'à fat dapartùt in dal cōrs dal tèmp.

In na New York dal futûr, durànt na sparatòria, al tasìsta Harry Canyon al salva la fiōla 'd 'n archeòlug. Chi lē la gh cònta dal Loc-Nar che 'l óm 'l iva catâ in dal deśèrt e che tut i criminài dla sità i vōlan.

Al nerd Dan, dòp avēr catâ sù 'n meteurît, al Loc-Nar, al vîṅ telepurtâ in 'n àtar mónd c'n un còrp dal tut difarènt e pîṅ 'd mùscui. C'n al nóm ad Den al salva la Katherine da 'n sacrifìsi a 'l dio Uhluhtc e chi lē, par ringrasiàr-al, la s fà gusàr da lò. In séguit la còpia la gh'à da far i cònt c'n i suldâ 'd Ard ch'i péscan la bòcia.

In na culònia spasiàla, al capitàṅ Sternn 'l è sóta prucès e 'l rìsćia la péna 'd mòrt. Cónt'r al parēr dal sò avucàt, 'l óm al ciàma a testimuniàr par lò un tisi ciamâ Hanover Fist. Śugànd c'n al Loc-Nar, chi lò al s trasfórma in un móstar e, in dal caśèṅ ch'a gh vîṅ, Sternn al gh'à la manéra 'd scapàr via.

Durànt la secónda guèra mundiàla al bumbardēr americàṅ B-17, durànt na misiòṅ su 'l ucéan Pasìfic al vîṅ culpî da na cónt'r-aparéć nemìga. A s salva sōl al co-pilòta ma 'l Loc-Nar al fà turnàr in vita tut i àtar mémbar d'l equipàǵ trasfurmâ in śómbi.

Durànt na riuniòṅ a 'l Pentàgun, al siensia Anrack al fà a mènt che la stenògrafa Gloria la gh'à 'n cióndul c'n al Loc-Nar dèntar. A 'l impruvìś a riva n'astrunàṿ ch'la i pòrta via tut dū esénd che Anrack, a dir dabòṅ, 'l è 'n robot a 'l servìsi di aglièṅ.

Al Loc-Nar, finénd in un vulcàṅ, al trasfórma na tribù dal pòst in móstar mutànt. La gint dla sità darènt la ciàma in ajùt la Taarna, ultma mémbra dla rasa gueriéra di Taarak, par difénd'r-i.

Culegamènt estéran