Gigolò

Da Wikipedia.
C'l artìcul chè 'l è scrit in Miranduléś Emiliàn
Erik Rhodes tòlt śò a 'l prim „Male Escort Awards“
Mr.International Escort 2010, Gio


Al tèrmin gigolò, ch'al daśvèṅ da 'l francéś, da dimóndi tèmp 'l è entrâ a far part dal vucabulàri itagliàṅ. Al vèṅ druâ insém a cal mistēr, fat da chi óm, in gènar ad cumpagnadōr ad dóni e 'd óm, in cambi 'd bèsi. Al gigolò, o anc óm escort o cumpagnadōr, al gh'à 'n rōl difarènt da qvél ch'a s prév pinsàr, la prustitusiòṅ di masć la n pōl minga èsar misa insém a qvéla ad cal dóni. La vója 'd pagàr p'r avér indrē facilmènt di favōr sesuài 'd óm bèi e musculóś l'à cuntagiâ anc al dóni, anc s'al far-'s avànti in cal caś chè 'l è dal tut difarènt e dal vòlti a s trata 'd dóni che p'r un mutìṿ o par c'l àtar i n gh'aṅ mai abû na vita sesuàla e cun di sentimènt ch'a gh dis sudisfasiòṅ.

La dóna mudèrna ch'la gira c'n al sò gambi dal tèrs milèni la gh'à da patìr dimóndi respunsabilità, lavōr, matrimòni, fiōi, da spés l'è custréta a far i cònt cun di rapòrt frust par cólpa 'd quèi da far òṅ adrē a c'l àtar diśumàṅ e 'l deśidèri d'l óm acsè al sa śmòrsa faghénd i cònt cun cal dóni chè pîni 'd impégn. A nas acsè 'l biśógn ad cunfarmàr al sò èsar fémna, ad traśgresiòṅ sénsa risć, ad gudiōl sesuàł a purtàda 'd click, cum a gh'è bèla par chi óm. In di ùltim déś an l'è carsùda na mùcia la prufèrta ad gigolò, ad purtài e ad sit ad gint da par lōr la réda l'è pîna.

Dimóndi ragàs arciamâ da di guadàgn fàcii i s véndan e i fànan cuntènt al viti ad dóni ch'in gènar i vànan da 'n mìnim ad trénta-sinc an a 'n màsim ad ssanta-sinc an. Da spés a s trata ad dóni ch'i piàś'n anc, beli ch'i 'mbarbìsan. Da spés a sa śbàlia quànd a s pénsa a lōr cun la figùra dla vècia visiàda cun di bèsi ereditâ anc se dal vòlti a pōl anc ès'r acsè. A gh'è dònca da paràr via 'l stereòtip ch'a gh s créd pôc ad Richard Gere in American Gigolò, al famuśìsim film ad Paul Schrader c'n al bèl Julian Kaye ch'al và ch'l è 'n piaśēr su la sò Mercedes SL Pagoda p'r al stradi 'd Beverly Hills, qvést chè 'l è 'l frut dla fantaśìa 'd un senegiadōr ch'a gh sà far.

At pó dar 'n òć anc a...

Materiàł p'r andàr-'g in fónd

  • Prostituzioni visibili e invisibili - Costantino Cipolla, Elisabetta Ruspini, ISBN 9788820401009

N.B. Cla pàgina chè l'è la tradusiòṅ dla pàgina Gigolò dla Wikipedia itagliàna acsè cum l'éra al 22 ad Śnar dal 2016