Andrea Gaudenzi

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


Andrea Gaudenzi, (Fënza, 30 ad Luj dal 1973, a s lèś [an'drɛa gau'deŋt͡si] in Itagliàn) 'l è stâ 'n tenìsta rumagnōl prufesiunìsta da 'l 1990, an in dua 'l à vins i tìtui dal Gran Slam di śōvan dal Roland Garros e di US Open. Al 27 ad Favràr dal 1995 'l è rivâ a èsar al nùmar daśdòt dal mónd, puśisiòṅ in dua al gh'è stâ par dū an a 'l incìrca. Anc par via ad soquànt infurtùni, 'l è stâ custrét a dar-ag sù in dal 2003. Al tiràva 'l arvèrs a dū maṅ e al druàva 'l bras dèstar.

In dla sò caréra 'l à muciâ sù da piò ad tri migliòṅ ad dòlar, vinsénd tri tìtui ATP in sla tèra rósa (a Caśablànca in dal 1998 e a St. Poelten e a Båstad in dal 2001). Inóltar 'l è stâ bòṅ ad bàtar, fra i àtar, Roger Federer, Pete Sampras, Alberto Berasategui, Jim Courier, Michael Stich, Evgenij Kafel'nikov, Sergi Bruguera e Thomas Enqvist.

Caréra

Andrea al fà sù i sò prim riśultâ impurtànt in di an da 'l 1994 a 'l 1996 quànd, faghénd alenamènt c'n al staff ad Thomas Muster, 'l è rivâ in semifinàl a Montecarlo, in di quàrt a Róma par dū vòlti, e in finàl a Stucàrda, Esturìl, San Marèṅ e Dubai (qvést chè a 'l quèrt). In dal 1994 'l è bòṅ ad bàtar Jim Courier a 'l Roland Garros, rivànd in di utàṿ in du al pèrd 2-6 7-5 4-6 3-6 da Goran Ivanišević.

In dal 1998 'l à śugâ la finàl dla Cópa Davis a Milàṅ cóntar la Śvèsia. Durànt al tie-break dal quìnt sèt cóntar Magnus Norman, durànt un servìsi, al s è fat mâl p'r un sćiànc a i narvòṅ dla spala in sal puntéǵ ad 6-7 7-6 4-6 6-3 6-6 e 'l è stâ custrét a dar-'g a muć.

Culegamènt estéran