Elesiòṅ generài in dal Régn Unî dal 2017

Da Wikipedia.
C'l artìcul chè 'l è scrit in Miranduléś Emiliàn
La Nicola Sturgeon
La Theresa May
Jeremy Corbyn


Gl’Elesiòṅ generài in dal Régn Unî dal 2017 i gh'ènan stadi 'l 8 ad Śugn dal 2017 p'r elèśar 650 mémbar dal 57śum Parlamènt dal Régn Unî.

A s trata 'd elesiòṅ antisìpadi vludi par la prima minìstra Theresa May ch'l'à fat un dascōrs in mèrit 'l 8 'd Avrìl dal 2017 fóra da 'l purtòṅ dal n.10 ad Downing Street. Chi lē la vliva 'l apòǵ dal pòpul par psēr andàr in Európa a 'lvàr la vóś cun più fòrsa par rivàr a di acòrd più favurévui p'r al sò paéś sénsa pagàr gnint[1] dòp ch'al referendum dla Brexit 'l iva decìś al dastàc dal Régn Unî da l'Ugnòṅ Européa.

Par la May «Brexit a vōl dir Brexit» e «Piutòst ch'un piutòst lòfi 'l è méj gnint»[2]. La prima minìstra la vliva aprufitàr-as dal fat ch'in di sundàǵ i sò Tories i éran davànti a i laburìsta 'd vint punt e dònca la cuntàva 'd purtàr a cà 'n squantèr'n ad parlamentàr, dimóndi da piò ad qvéi fat sù da David Cameron in dal 2015, anc parchè in dal Régn Unî a gh'è 'n magiuritàri séc a 'n tùran sōl.

I sò rivài i ér'n al laburìsta “rós” Jeremy Corbyn, la scuséśa indipendentìsta Nicola Sturgeon, ch'in dgl'elesiòṅ ad dū an prima l'iva praticamènt fat al pîṅ in Scòsia faghénd suo 56 séǵ su 59, al liberàł demucràtic Tim Farron, Paul Nuttall dal Partî par l'indipendénsa dal Régn Unî ch'l iva ciapâ 'l pòst lasâ lìbar da Nigel Farage, la nòrd-irlandéśa cunservadōra Arlene Foster dal Partî Demucràtic Ugnunìsta, Gerry Adams dal Sinn Féin e la separatìsta galéśa Leanne Wood dal Plaid Cymru.

Durànt la campàggna eleturàla a gh'è stâ dū atintâ da part ad terurìsta iślàmic a Manchester e a Lóndra.

Riśultâ

Culéǵ dal Régn Unî: in blù qvéi vins da i cunservadōr, in rós i laburìsta, in śal qvéi dal SNP, in aràns i liberài demucràtic, in ròśa qvéi dal DUP, in vérd ciàr qvéi dal Sinn Féin, in vérd scûr qvéi dal Plaid Cymru

Al Partî Cunservadōr al gh l'à cavàda a rivàr prim ma 'l à pardû la magiurànsa dla cambra di Cumùṅ par via dl'armuntàda di laburìsta ch'i aṅ guadagnâ 'l 9,5% di vōt rispèt a 'l 2015. Al Partî par l'indipendénsa dal Régn Unî 'l è stâ spasâ via pasànd da 'l 12,6% a 'l 1,8% e anc al Partî Nasiunàł Scuséś 'l è crudâ dimóndi calànd a 'l 3,0% da 'l 4,7% ad dū an prima.

Par turnàr a 'l guèran, la Theresa May la vōl strìnśar 'n acòrd c'n al Partî Demucràtic Ugnunìsta dl'Irlànda dal Nòrd.

Partî Cap Vōt % Séǵ Difarénsa
c'n al 2015
Partî Cunservadōr Theresa May 13.632.914 42,3% 317 -13
Partî Laburìsta Jeremy Corbyn 12.874.985 40,0% 262 +30
Partî Nasiunàł Scuséś Nicola Sturgeon 977.569 3,0% 35 -21
Liberài Demucràtic Tim Farron 2.371.772 7,4% 12 +4
Partî Demucràtic Ugnunìsta Arlene Foster 292.316 0,9% 10 +2
Sinn Féin Gerry Adams 238.915 0,7% 7 +3
Plaid Cymru Leanne Wood 164.466 0,5% 4 +1
Vérd Jonathan Bartley e Caroline Lucas 525.371 1,6% 1 =
Speaker John Bercow 34.299 0,1% 1 =
Indipendènt Sylvia Hermon 16.148 0,1% 1 =
Partî par l'indipendénsa dal Régn Unî Paul Nuttall 593.852 1,8% 0 -1
Partî Suciàl Demucràtic e Laburìsta Colum Eastwood 95.419 0,3% 0 -3
Partî Ugnunìsta d'l Ulster Robin Swann 83.280 0,3% 0 -2
Partî dl'Aleànsa dl'Irlànda dal Nòrd Naomi Long 64.553 0,2% 0 =

Nòti