Dieci piccoli indiani (film 1945)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg And Then There Were None
Dieci piccoli indiani
Dieci piccoli indiani (film 1945).png
La June Duprez in na figùra dal film
Déś indiàṅ pìcui
1945
Regia: René Clair
Scritùr: Agatha Christie • Dudley Nichols
Atùr: Louis HaywardWalter HustonJune Duprez
Barry FitzgeraldRoland YoungJudith Anderson
Müsica: Mario Castelnuovo-Tedesco
Lengua: Ingléś
Dürä dal film: 97 minüt
Nasiòṅ: Stat Unî


«
A 'l inìsi i ér'n in déś ma pò a n gh'è armàś più ninsòṅ.»
(Tagline dal film)


Dieci piccoli indiani (Déś indiàṅ pìcui) 'l è 'n śal americàṅ in biànc e négar dal 1945 ad René Clair premiâ a la 1ma edisiòṅ dal Fèstival ad Lucàrn.

La pelìcula l'è trata da 'n rumànś umònim dal 1939 dl'Agatha Christie ch'l à dâ vita a àtar dū film, Dieci piccoli indiani ad George Pollock (1965) e Dieci piccoli indiani 'd Alan Birkinshaw (1989) e a di àtar film in na quàlc manéra cumpàgn cuma ...e poi, non ne rimase nessuno ad Peter Collinson (1974), Invito a cena con delitto ad Robert Moore (1976), Tutti defunti... tranne i morti ad Pupi Avati (1977) e Incubo finale ad Danny Cannon (1998).

Sunt

Òt parsòni ch'i n s cgnósan briśa i èṅ invidàdi da 'n sèrt sgnōr Owen a pasàr un fiṅ 'd stmana in n'ìśula dla Curnuvàglia ciamàda Nigger Island in du a n gh'astà ninsòṅ ma a gh'è sōl na vila che lò 'l à tòlt in afìt.

Gl'òspit i èṅ la sgnurìna Vera Claythorne (June Duprez), al dutōr Edward Armstrong (Walter Huston), al vèć giùdas Quinncannon (Barry Fitzgerald), la puta religióśa Emily Brent (Judith Anderson), al prìnsip rus Nikita Starloff (Mischa Auer), al generàł John Mandrake (C. Aubrey Smith), al detective William Henry Blore (Roland Young) e 'l viaśadōr Philip Lombard (Louis Hayward).

Manifèst uriginàł dal film

Rivâ a Nigger Island, scarusâ p'r al barcarōl Fred Narracott (Harry Thurston), in dla vila i càt'n al majurdòm Thomas Rogers (Richard Haydn) e la dóna di fat e sò mujér Ethel (Queenie Leonard) ch'i gh dàn'n al bèṅvgnû e ch'i gh prepàran la séna su na tavla in du a gh'è dal statṿi ad déś indiàṅ. A la Vera a gh vîṅ in mènt na vècia filastròca ch'la cuntàva la stòria ad déś indiàṅ ch'i murìv'n òṅ adrē a c'l àtar.

Cla sira lè, mént'r i òspit i èṅ in salòt a far dū ciàcri, Thomas al mét sù 'n disc in du a s sènt la vóś dal sgnōr Owen ch'al gh dà di sasèṅ a tut e subìt dòp Starloff al mōr velenâ cun dal cianûr in dal bicér, pò 'l è 'l tùran dl’Ethel ch'la pèrd la vita parchè i gh'ìvan dâ tròp sunìfar. Al grup al capìs che Owen al vōl vindicàr-'s ad lōr cupànd-i òṅ a òṅ ma, esénd ch'in dl'ìśula a n gh'è ninsòṅ àtar, 'l è ciàr che 'l padròṅ 'd cà 'l è in mèś a lōr. E quànd òṅ al mōr a sparìs anc na statṿa da 'l tàvul.

I òt ch'i èṅ scampâ i vrévan scapàr via ma 'l è 'n quèl impusìbil parchè al barcarōr al turnarà sōl lunadè. Quànd al dè dòp a vîṅ catâ 'l cadàvar scurtlâ dal generàł in spiàgia, al grup al mét a i vōt al nóm dal suspetâ ch'al riśùlta ès'r al majurdòm. Chi lò al và a durmìr in dal ciûś dla léggna ma la quàrta vitma l'è pròpria lò, cupâ c'n un cōlp ad manàra in cô.

Culegamènt estéran