Candy Candy

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Candy cun la róśa ch'al gh'à śibî Anthony


Candy Candy (キャンディ・キャンディ in giapunéś, Kyandi Kyandi) 'l è 'n fumét manga e 'n cartòṅ animâ giapunéś ad 115 epiśòdi trat da 'l rumànś umònim dla Kyoko Mizuki ambintâ in di prim an dal Nuvsènt.

Al cònta la vita dn'òrfna ciamàda Candy.

Sunt

La Candy l'è na putìna òrfna c'n al tuchìni in ghigna ch'la crés in 'n istitùt religióś ad sōri ciamâ “La cà 'd Pony” dla Miss Pony e dla Sōra Marìa. A far-ag cumpagnìa a gh'è 'n pruciòṅ ad nóm Klin e l’Annie, la sò amìga dal cōr. Quànd chi lē la vîṅ adutàda da la famìja burghéśa di Brighton, la Candy l'armàgn da par lē paténd dimóndi.

Un dè la Candy, dvintàda na ragasōla, l'incróśa un bèl ragàs misterióś c'n i cavìi biónd e 'n kilt scuséś adòs. Par far-ag pasàr al magòṅ chi lò al gh sòna quèl cun la sò còrnamùśa, pò al sparìs pardénd però prima na spila cun na "A" insìma. La Candy la taca a insugnàr-'s-al da spés e la 'l batéśa “al Prìnsip dla Culìna”.

In séguit la ragàsa la vîṅ adutàda anc lē andànd a star a Chicago da la famìja aristucràtica di Legan. La dvènta amìga dla ragàsa di fat, la Dorothy, ma minga di fiōi dal padròṅ ad cà, la Iriza e Neal, ch'i èṅ catìṿ, visiâ e ch'i gh daṅ sèmp'r adòs parchè i n s cumpatìsan briśa na “surèla” a la bòna, pòvra e tòlta via da 'n urfanutròfi. Stand in cal mónd lè, la Candy la gh'à la manéra 'd cgnósar la famìja dgl’Andrew cmandàda da 'l misterióś sîṅ William che però al n s véd mai. Sóta la sevēra sîna Elroy, ch'la decìd tut lē, la Candy la fà amicìsia c'n i sò anvōd, al milurdèṅ Archie, 'l inventōr pastisòṅ Stear e 'd sò cuśèṅ Anthony ch'al sumìlia dimóndi a 'l Prìnsip dla Culìna, anc al scûd dla sò caśàda 'l è cumpàgn a 'l sìmbul ch'a gh'éra su la spila. La ragàsa la s liga dimóndi a Anthony, ch'l è bòṅ ad cōr e ch'a gh piàś cultivàr al róśi, ma 'n brut dè, durànt la casa a la vólp, al śōvan al mōr cascànd śò da cavàl.

La Candy la próa a far-as pasàr cal brut mumènt lè turnànd a la cà 'd Pony e pò, tgnénd adrē a 'n deśidèri dal sîṅ William, andànd in culéǵ a Lóndra insém a Archie, Stear, l’Iriza e Neal. A la Royal Saint Paul School la cata incóra l’Annie, ch'la s inamóra 'd Archie, e la s fà amìga cun na ragàsa ch'la sà incòśa e ch'la pòrta di uciài, la Patty. Méntar chi lē la s mét insém a Stear, la Candy la próa a daśmindgàr Anthony c'n un ragàs arvèrs ch'al vōl dvintàr atōr, Terence Granchester. In cal méntar l’Iriza la fà da tut par far casàr via da la scóla la Candy strulgànd di tragatèṅ cónt'r ad lē e la gh la cava. La Candy la decìd ad turnàr in di Stat Unî par studiàr da infarméra in d'l istitùt dla Miss Mary Jane anc parchè 'l sò paéś 'l è drē a cumbàt'r in dla prima guèra mundiàla e la ragàsa la vōl èsar 'd ajùt.

La Candy la gh'à la manéra 'd curàr Albert, un ragàs dla famìja di Andrew ch'l iva pardû la memòria durànt un cumbatimènt in Itàglia, ma minga Stear ch'l éra partî vuluntàri in Európa murénd in batàja. Se la Patty la gh'à 'l cōr scavśâ da la mòrt dal sò muróś, anc la Candy la gh'à da patìr parchè Terence al s mét par pità cun la Susanna, n'atōra armàśa uféśa a 'l gambi par salvàr-al durànt un spetàcul in dal méntar ch'un rifletōr 'l éra drē a cascàr-'g adòs.