Accidental Love

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Accidental Love
Accidental Love.png
James Marsden in na figùra dal film
Amōr asidentàł
2015
Regia: David O. Russell
Scritùr: Matthew Silverstein
Kristin Gore • Dave Jeser
Atùr: Jessica BielJake GyllenhaalJames Brolin
Beverly D'AngeloJames MarsdenTracy Morgan
Müsica: John Swihart
Lengua: IngléśPurtughéś
Dürä dal film: 100 minüt
Nasiòṅ: Stat UnîRégn Unî


«
Dal vòlti 't inciòld 'l amōr... di atri vòlti 'l amōr 'l inciòlda tè.»
(Tagline dal film)


Accidental Love (Amōr asidentàł) l'è na cumèdia americàna dal 2015 ad David O. Russell, firmàda cuma Stephen Greene.

A 'l inìsi, quànd i èṅ tacàdi 'l ripréśi in d'l Avrìl dal 2008, al film al gh'iva da ciamàr-as Nailed e al gh'iva da 'vēr-ag fra i prutagunìsta James Caan che però pò 'l à bandunâ 'l prugèt lung la via. In séguit la prudusiòṅ la gh'à abû dimóndi prubléma p'r al fat ch'al cast e la troupe i n éran briśa stâ pagâ. In dal Luj dal 2010, quànd al muntàǵ al n éra minga incóra terminâ, anc al regìsta 'l à tajâ la còrda tant ch'la pelìcula i 'l aṅ finìda di àtar. A film 'l à acsè vdû la luś sōl in dal 2015, in dal canàł di video on demand.

Custâ vint-siē migliòṅ ad dòlar e buciâ da i crìtic, al film al 'n à pò fat sù sōl sènt-trentanovmìla.

Sunt

L’Alice Eckle (Jessica Biel) l'è na śuvnòta d'l Indiàna ch'la lavóra in un fast food. I sò genitōr Bob (Steve Boles) e l’Helen (Beverly D'Angelo) i èṅ dimóndi cuntènt quànd al sò muróś pulisiòt Scott (James Marsden) al decìd finalmènt ad śibìr-ag 'l anèl ad fidansamènt invitànd-la fóra a séna in un risturànt itagliàṅ i du i fàn'n al famóśi fujàdi “Alfredo”.

Purtròp quànd i dū i èṅ là, a sucéd 'n incidènt. 'N uperàj al strabùca śò méntar 'l éra drē a giustàr na strutùra e cun la sò màchina spara-ciòld 'l insfìlsa 'n ciòld in dal crani dla pòvra ragàsa. Esénd che chi lē la n gh'à minga n'asicurasiòṅ par la salùt, i mèdag i n la òpran briśa, dgénd-ag ciàr e tónd ch'la và in a risć ad murìr o 'd avēr-ag di prubléma a dascórar o sinò, giusà, la prév anc dvintàr na purcùsa a lèt. Tant p'r armàgnar su 'l sicûr, Bob al gh tira via 'l anèl da 'l , vō't mó dir ch'la pòs' armàgn'r uféśa par sèmpar, a n s sà mai.

Cun 'l ajùt 'd un sò amìg ch'al gh'à 'l prubléma dal budèli ch'i gh vìnan fóra da 'l buś dal cûl, Keyshawn (Tracy Morgan), e 'd un prevòstar ch'al gh'à sèmp'r al cas dûr da quànd 'l à tòlt dal Viagra e dal Cialis, al reverénd Norm (Kurt Fuller), l’Alice la và a Washington par dmandàr a 'l mémbar dal cungrès dal sò bandi Howard Birdwell (Jake Gyllenhaal) ad pugiàr-la in dla sò batàja par na sanità pùblica.

Culegamènt estéran