Acapulco, prima spiaggia... a sinistra

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Acapulco,
prima spiaggia... a sinistra
Acapulco prima spiaggia a sinistra.png
Roncato e Sammarchi in na figùra dal film
Acapûlc, prima spiàgia... a sinìstra
1982
Regia: Sergio Martino
Scritùr: Massimo Franciosa • Sergio Martino
Atùr: Gigi SammarchiAndrea RoncatoGegia
Simona MarchiniAnna KanakisSerena Grandi
Müsica: Detto Mariano
Lengua: Itagliàṅ
Dürä dal film: 88 minüt
Nasiòṅ: Itàglia


«
Viva cal dóni ch'i èṅ cuma l'àqua banadìda, quànd 't li tóc al miràcul al n manca mai!»


Acapulco, prima spiaggia... a sinistra (Acapûlc, prima spiàgia... a sinìstra) l'è na cumèdia ad Sergio Martino ambintàda a Bulógna e a Siśnàtic.

Par cal film chè Gigi e Andrea i cànt'n al braṅ “Ci do che ci do che ci do” (A gh dag ch'a gh dag ch'a gh dag).

Sunt

Gigi (Gigi Sammarchi) e Andrea (Andrea Roncato) i èṅ dū scansafadìghi bulgnéś sénsa lavōr ch'i pènsan sōl a cur'r adrē a 'l stanèli ad cal dóni, a paròli, parchè ad gusàr a n s in dascór. I s faṅ avànti sōl dal bruti fighi cuma la Romilda (Nicoletta Piersanti). Al pàd'r ad Gigi al fà 'l autìsta 'd bus a Bulógna, i genitōr 'd Andrea invéci i èṅ idràulic e caséra in un cìnema pòran in dua i aṅ tòlt da pôc na màscra nóva (Serena Grandi). Chi lōr i gh'aṅ però al bras curt quànd a s trata ad ślungàr-ag di bèsi. Adès ch'l è Agóst qvést 'l è 'n prubléma parchè a sarév óra 'd partìr p'r al vacànsi. Gigi e Andrea i faṅ dimóndi i śburòṅ dgénd in gir ch'i vōlar partìr p'r un viàś eśòtic, Acapûlc par dir-'n una. I al faṅ anc da 'l barbēr in dua a lavóra na dóna pugléśa inamuràda 'd Andrea, la Miranda (Gegia), dimóndi basa ma c'n al scutmàj ad “cûl 'd òr”. Fra óm a s dascór ch'a Siśnàtic a gh'è una ch'la gh'à 'n paltèṅ ch'l'è dimóndi purcùsa e ch'la la dà a tut. 'L è abàsta dmandàr di fulminànt Minerva e pò pasàr a dascór'r ad Vènar e 'l śōg 'l è fat.

A sucéd pò ch'i dū amìg i finìs'n invéci p'r andàr a dmandàr na cambra a la sîna 'd Gigi, la Zelmaide (Annabella Schiavone), ch'la gh'à na pensiòṅ a Siśnàtic ma ch'la n s pōl briśa cumpatìr sò anvōd. La dóna la gh dà na cambra, ma una ad qvili lòfi dimóndi. 'L impurtànt p'r i dū galét 'l è ès'r a 'l mâr par catàr da gusàr facilmènt ma pò tant fàcil a n è minga. Andrea al gh próa subìt cun l’Ines(e) (Simona Marchini), na dóna ch'l'à pasâ i quarànta, ch'la gh'à 'n negòsi a Róma e ch'la s fà ciamàr Deborah. A sucéd però ch'l è tròp sfaciâ e ch'al gh mét al maṅ adòs subìt e qvala lè la 'l para via in quàt'r e quàt'r òt. I dū i próan pò a tōr na babysitter sprand che pò, na vòlta in cambra, a gh véggna vója anc a lē. Ma a riva una 'd Bulsàṅ (Sabine Jager) ch'la n gh'à minga tanta vója 'd schersàr. A 'l mâr a gh sarév anc na dóna cun dla vója, la vèneta Marta (Clarita Gatto), anc parchè sò marè Diomede (Nanni Saturno) 'l è via. Purtròp lì lē la gh'à sèg al sò baghét, un masćèṅ minga tant gustóś, ch'al fà sōl di dispèt a i dū bulgnéś. Quànd Gigi al gh la cava a far-ag di sfrēg dand-ag la créma, a riva Diomede ch'al gh dà śò, a lò e a Andrea specialmènt. Cun la tabacàra (Mirella Banti), ch'l'è anc na bèla figa, al ròbi i n vànan mia p'r al vèrs giùst, a n cònta gnint cumpràr scatli su scatli 'd fulminànt, a s pōl anc dar ch'la n sia minga lē qvéla dal ciàcri da 'l barbēr. Pò l'è la vòlta ad dū dóni napulitàni, la Marina (Anna Kanakis) e la Silvana (Patrizia Focardi) ch'i vànan sèg a séna sōl parchè i crédan ch'al barcòṅ ch'i aṅ vdû al sia lōr. Quànd i capìsan però che lōr i èṅ sōl di buletàri, i s in vànan subìt.

Al vacànsi i èṅ drē a finìr acsè cuma la spransa 'd gusàr. Ma l'ultma nòt na dóna cun asènt ingléś e tuta imbariàga (Laurie Sherman) la dmanda a i dū 'd andàr a lèt sèg, la 'l à scumìs cun sò marè (Jacques Stany), la vōl far-as dū itagliàṅ. Purtròp anc 'sta vòlta a n sucéd gnint parchè a fòrsa 'd bévar i s indurménsan e 'l dè dòp la ciùca a lē la gh'è bèla pasàda dònca anc la vója 'd far la rója.

Turnâ a Bulógna a Gigi e Andrea a n gh armàgn àtar ch'andàr a lèt cun la Miranda e na sò amìga sardagnōla, la Bonaria Puddu (Fausta Pittoni), ghigna 'd arvultàr al stómag ma almànc téti fati bèṅ.

Culegamènt estéran