40 anni vergine

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg The 40 Year-Old Virgin
40 anni vergine
40 anni vergine.png
Ruud, Rogen, Malco, Carell e la Miki Mia in na figùra dal film
40 an vìrgin
2005
Regia: Judd Apatow
Scritùr: Judd Apatow • Steve Carell
Atùr: Steve CarellCatherine KeenerPaul Rudd
Romany MalcoSeth RogenElizabeth Banks
Leslie MannJane LynchGerry Bednob
Müsica: Lyle Workman
Lengua: Ingléś
Dürä dal film: 116 minüt
Nasiòṅ: Stat Unî


«
Più tèmp 't aspèt e più a sarà dûr.»
(Tagline dal film)


40 anni vergine (40 an vìrgin) l'è na cumèdia americàna dal 2005 ad Judd Apatow cun prutagunìsta Steve Carell ch'al 'l à anc prudót.

'L à purtâ a cà da piò ad sènt-stantasèt migliòṅ ad dòlar esénd-an custâ sōl vint-siē. La versiòṅ XXL par l'home video l'è più lunga ad darsèt minùt.

Sunt

Andy Stitzer (Steve Carell) al gh'à 'n lavōr sicûr in na cadéna ad prudót letrònic e 'n bèl apartamènt pîṅ ad fumét ma al gh'à 'n prubléma: 'l è incóra vìrgin anc s'al gh'à bèla quarànt'an. I sò culéga David (Paul Rudd), Cal (Seth Rogen) e Jay (Romany Malco) i nàśan quèl durànt na partìda a poker e i 'l vōlan jutàr dòp avér-al tòlt in gir un bèl pôc. Na sira i al pòrtan sèg in un pub e i gh cunsìlian ad puntàr a 'l dóni bèli e imbariàghi, esénd la prima vòlta anc più imbariàghi che bèli. Furtùna a vōl che lè i gh sìan di amìghi ch'i gh'aṅ da festegiàr una ch'la gh'à da spuśàr-as 'l dè dòp. Una ad qvili lè, na biónda purcùsa ch'la s ciàma Nicky (Leslie Mann), la gh śibìs 'd andàr sèg ma esénd imbariàga pódga e guidànd lē parchè Andy 'l è sénsa màchina, durànt al viàś la la bùcia a róta 'd còl e pò, avénd alvâ 'l gòmat dimóndi, la gh'à anc 'l urt dal gòmit ch'la gh al sprica tut in fàcia. Lē la gh la darév vluntéra listés ma lò al s tira indrē.

Un dè a fà 'n salt in dal negòsi la Trish Piedmont (Catherine Keener), una ch'la vénd di śavàj lè darènt par cònt ad chi àtar su eBay. Prima 'd andàr via la gh lasa 'l sò nùm'r ad telèfun. I sò amìg i gh dìśan 'd a n ciamàr-la briśa subìt parchè prima al gh'à da far pràtica cun dal pràtichi, méj se dimóndi rój, o sinò faghénd-al subìt cun lē al risćiarév ad far na figùra da imbambî, specialmènt s'al gh tîṅ dimóndi. In tut al manéri, p'r èsar più sexy, Jay al gh cunsìlia 'd andàr-'s a far na seréta par cavàr-as via tut chi pēi ch'al gh'à in sal pèt ch'al pâr un lóv manâr. Quànd l'estetìsta (Miki Mia) la tira via al siròt lò al gh ingùra tant ad chi càncar ch'l al sà sōl lò.

Un dè finalmènt Andy al cata 'l curàǵ ad dmandàr a la Trish 'd andàr fóra insém e pò i finìs'n anc a lèt cun lē ch'la gh diś ad mét'r-as un guldòṅ méntar la s và a preparàr in bagn. Andy al n sà in du tacàr ma qvél ch'l è pèś 'l è ch'a riva a 'l impruvìś la fiōla dla Trish, la Marla (Kat Dennings), ch'la i bèca in dla cambra da lèt. Ma i sò fiōi i èṅ tri a dir-la tuta e lē l'è anc nunóna parchè qvéla granda la gh'à 'n putèṅ ad 'n an.

Culegamènt estéran