Sinead O'Connor

Da Wikipedia.
C'l artìcul chè 'l è scrit in Miranduléś Emiliàn
La Sinéad O’Connor tòlta śò in dal Śugn dal 2008


«
I could put my arms around every boy I see but they'd only remind me of you, I went to the doctor n'guess what he told me, guess what he told me, he said girl u better have fun, no matter what u do but he's a fool, 'cause nothing compares, nothing compares 2 u. All the flowers that u planted, mama, in the back yard, all died when u went away, I know that living with u baby was sometimes hard but I'm willing to give it another try.»
(EN)(Nothing compares 2 U, 1990)
«
A pòs mét'r al mè maṅ adòs a tut i ragasói ch'a véd ma chi lōr i n farésan àtar che far-um arcurdàr ad tè, a sòṅ andàda dal dutōr, próva a dir cuś al m à dit, próva a dir cuś al m à dit, baghéta a sarés méj ch'at t divertìs, quél ch'at fà al n cónta minga ma lò al n capìs gnint, parchè gnint 'l è cumpàgn, gnint 'l è cumpàgn a tè. Tut i fiór ch'a-j-ò strapiantâ da drē dal curtìl, i èṅ mòrt tut quànd lò 'l è andâ via, al sò che vìvar tèg 'l éra un quèl difìcil ma a sòṅ prónta a pruàr incóra na vòlta.»
(MUD)


La Sinéad Marie Bernadette O'Connor (la s lèś /ʃɪˈneɪd oʊˈkɒnər/) l'è na cantànta irlandéśa nada a Dublìn 'l 8 ad Dicémbar dal 1966. L'è una dal vóś più bèli di an Utànta e Nuànta e la gh'à un caràtar fòrt, da spés còntra la masa. L'è anc cgnusùda par via dla sò crapa plàda (la tgnìva i cavìi a śèr) e dal sò upignòṅ ch'i fàvan dascórar.

Biugrafìa

Sinéad la nas da na famìja pîna ad fiói (sò fradèl, Joseph O'Connor 'l è un scritōr ad sucès) e l'impàra da śóvna a sunàr la chitàra e a far dal canti par sò cònt mèntar l'éra drē a 'ndàr a scóla. Quànd la gh'iva quatórd'ś an la s unìs a 'l grup irlandéś In Tua Nua faghénd sèg al braṅ Take my hand, un sucès dal 1984. In séguit la lavóra insém a la banda di Ton Ton Macoute avénd-ag un cuntràt cun l'etichéta Ensign Records.

In dal 1985 Sinéad la sa stablìs a Lóndra par lavuràr a 'l sò prim àlbum. The Lion and the Cobra (Al leòṅ e al còbbra), scrit e prudót da lì lē, a véd la luś in dal 1987 e i crìtic e al pùblic i èṅ da la sò banda fin da subìt. In dal disc la figùra anc na śóvna Enya che, in dal braṅ Never Get Old, la rècita in Gaêlic soquànt pas da la Bìbbia. Vist al sucès, Sinéad la ś mét in viàś par di cuncèrt in Europa e in di Stat Unî. Quél dal teàtar Dominion ad Lóndra dal Śugn dal 1988 al vèṅ tòlt śò p'r al regìsta John Maybury e publicâ 'l an dòp cun al tìtul ad The Value of Ignorance (Al valōr 'd a n savér gnint). In dal 1989 Sinéad la fà anc na part in dal film Hush-A-Bye-Baby.

Al sò braṅ più cgnusû ad tut al rèsta al sìngul Nothing Compares 2U dal 1990, un lènt ch'al tōś a 'l cōr, mis dèntar a 'l sò secónd disc I Do Not Want What I Haven't Got (A n vój briśa quél ch'a n gh'ò minga). Al pès, scrit da Prince in dal 1985 p'r i Family, al gh la cava a sfundàr in dal clasìfichi ad tut al mónd.

Sèmpar in cal perìud lè, in fiṅ a 'l 1991, la s mét insém a 'l cantànt di Red Hot Chili Peppers, Anthony Kiedis ch'al canta par lē al braṅ I Could Have Lied mis dèntar a 'l àlbum Blood Sugar Sex Magik ma lē la 'l mòla listés tulénd 'n aparéć p'r andàr via da Los Angeles.

In d'l Utóbar dal 1992, mèntar l'éra drē a cantàr War ad Bob Marley a 'l Saturday Night Live, la càmbia tut 'd un trat al paròli dal tèst, dand adòs a la Cēśa catòlica par via dal prubléma di prēt pedòfil e sćiancànd a la fîṅ na fòto dal pàdar sant dgénd «Cumbatìṿ al nemìg, quél vér»[1]. Al sò culéga Frank Sinatra al gh rispónd dgénd ch'al la turév a cals in dal cûl. Sōl soquànt an dòp, in dal 1997, la Sinéad la dmandarà scuśa a 'l Papa durànt n'intervìsta.

Sinéad O’Connor durànt un sò cuncèrt dal 2007

In dal 1992 la O'Connor la fà gnir fóra na racòlta ad cover ciamàda Am I Not Your Girl (Sòṅ-j-a minga la tò ragàsa?) cun di braṅ ad Marilyn Monroe (I Wanna Be Kissed By You), Billie Holiday (Gloomy Sunday) e àtar. A s cata anc la canta Don't Cry For Me Argentina cantàda anc par la Madonna.

Par l'irlandéśa 'l è un brut mumènt: butàda śò par la crìtica, la patìs anc na depresiòṅ. Par sò furtùna, Peter Gabriel al la ciàma sèg in dal sò Womad Tour.

Al disc dal 1994 Universal Mother 'l è un lavōr dimóndi sintî ma al gh'à di élt e di bas: da arcurdàr John I Love You didicàda a sò marè e My Darling Child fata p'r i sò putèṅ. A gh'è anc na cover di Nirvana, All Apologies.

A partìr da cal disc chè, al vénditi i tàcan a 'ndàr śò anc parchè lē la s fà védar pôc.

In di an Nuànta Sinéad la dvénta un prevòstar, urdnàda acsè da un muvimènt catòlic indipendènt e la taca a far-as ciamàr Màdar Bernadette Mary, dgénd anc ch'la vōl abandunàr l'indùstria discugràfica.

Un sundàǵ dal 1999 dla rivìsta di óm Himself al stablìs ch'i masć irlandéś i n vrésan mai andàr fóra sèg parchè i la crédan bruta e na śbragamaròṅ[2].

La fà anc savér par mèś dla rivìsta Hot Press 'd èsar stàda a lèt cun dal dóni. In dal disc dal 2000 Faith And Courage (Fēd e curàǵ) la canta No Man's Woman (Dóna ad gnanc 'n óm).

In dal 2003, in ucaśiòṅ dla surtìda dal dvd Goodnight, thank you - You’ve been a lovely audience (Bonanòt, a v ringràsi - A sî stâ un pùblic delisióś) la fà savér ch'la gh à vója ad muclàr-la lè: «A-j-ò decìś ad ritiràr-um parchè a n supórt piò 'd èsar na parsòna famóśa. A vrév na vita nurmàla, in dua al parsòni i gh'ìsan rispèt par la mè riservadésa. A sòṅ dimóndi timda, a vój èsar lasàda in paś»[3].

In dal 2005 la diś in n'intervìsta a Interview che al sò scòp in dla vita 'l è quél ad „salvàr Dio da la religiòṅ“[4], mèntar in d'l Utóbar dal 2007 la diś a 'l Oprah Winfrey Show ch'l'à anc pruvâ a tōr-as la vita al dè ch'l'à cumpiû trénta-tri an, i an ad Crist.

In d'l Agóst dal 2011 la fà savér in sal sò sit ch'la vōl un masć, al và bèṅ anc òṅ par na bòta e via, ma al gh'à 'd avér da méno ad 44 an e èsar pelōś. Ad quéi glàbar a n s in dascór e gnanc ciamàr-as Brian o Nigel a và bèṅ. Avénd vója ad far dal sès, la patìs la mancànsa dla matéria prima ma la s cunsóla druànd dla fruta e dla vardùra a 'l sò pòst. La gh 'n à a basta ad far la sōra[5].

Discugrafìa

Àlbum

  • 1987 - The Lion and the Cobra
  • 1990 - I Do Not Want What I Haven't Got
  • 1992 - Am I Not Your Girl?
  • 1994 - Universal Mother
  • 2000 - Faith and Courage
  • 2002 - Sean-Nós Nua
  • 2005 - Throw Down Your Arms
  • 2007 - Theology
  • 2011 - Home

Culegamènt estéran

Nòti