Psycho II

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Psycho II
Psycho II
Psycho 2.png
La Vera Miles in na figùra dal film
Psycho II
1983
Regia: Richard Franklin
Scritùr: Tom Holland
Atùr: Anthony PerkinsMeg TillyVera Miles
Robert LoggiaDennis FranzHugh GillinClaudia Bryar
Müsica: Jerry Goldsmith • Bernard Herrmann
Dürä dal film: 113 minüt
Lengua: Ingléś
Nasiòun/Paèiş: {{{Nasiòun/Paèiş}}}


«
I èṅ pasâ vint-a-dū an e Norman Bates al tórn' a cà»
(Tagline dal film)


Psycho II 'l è 'n film thriller dal 1983 ad Richard Franklin, séguit dal capulavōr Psyco 'd Alfred Hitchcock dal 1960.

Custâ sinc migliòṅ ad dòlar a 'l incìrca, la pelìcula la 'n à pò purtâ a cà trénta-sinc, faghénd in manéra, vist al sucès, ad dar vita a 'n àtar sequel (Psycho III dal 1986) e a 'n prequel (Psycho IV: The Beginning dal 1990).

Sunt

Al set ad Psycho a Hollywood
Al Bates Motel

Dòp vint-a-dū an pasâ in manicòmi, Norman Bates (Anthony Perkins) 'l è giudicâ guarî e saṅ ad mènt a par cal mutìṿ al pōl èsar mis lìbar. La Lila Loomis (Vera Miles), surèla dla Marion Crane (che Norman 'l iva scurtlâ sóta la dócia) e védva ad Sam Loomis, la và śò 'd tèsta quànd la sènt la deciśiòṅ di giùdas e la taca a catàr sù dal firmi par far-al turnàr dèntar ma a n gh'è gnint da far.

Al psicòlug dutōr Bill Raymond (Robert Loggia) al s fà càrag ad purtàr-'l a cà e ad tgnir-'g adrē. Adès al mutèl 'l è purtâ avànti da 'n gestōr nóṿ, Warren Toomey (Dennis Franz).

Al dè dòp Norman, p'r arfàr-as na vita, al taca a lauràr in na tavla calda dal pòst lavànd śò, faghénd da magnàr e tulénd sò gl'urdinasiòṅ di cliènt. La lavóra sèg la cōga Emma Spool (Claudia Bryar) e la śóvna Mary Samuels (Meg Tilly). Chi lē, esénd-as mulàda cun al sò muróś, la dmanda a Norman ad catàr-ag na cambra in dal sò mutèl par pasàr la nòt ma lò al la tōś in cà quànd al vèṅ a savér che Toomey al s è mis a fitàr al cambri a di spurcaciòṅ.

A un sèrt punt Norman al taca a sintìr di stus straṅ in dla sò vila cardénd acsè che sò màdar la sia in cà, anc parchè pò al ricév na telefunàda in dua na dóna la gh diś 'd èsar lē. In cal méntar na figùra vistìda ad négar la masa Toomey in dal méntar ch'l è drē a 'ndàr via. A mōr anc un ragasōl in cantìna in dua 'l éra andâ par ciulàr in paś la sò muróśa. Chi lē la gh la cava però a scapàr via e a ciamàr al sierìf ma, quànd a riva la pulisìa, al cadàvar dal śóvan a n s cata minga.

Un dè la Lila la s véd in un bar par dascórar cun la Mary, ch'la sarés pò sò fiōla. Al dū dóni i èṅ 'd acòrd par far crédar a Norman che sò màdar la sia incór' in vita quànd invéci 'l è la Loomis ch'la s vistìs cuma lē e la fà 'l telefunàdi dgénd 'd èsar lē par far-al dvintàr mat incóra e par far-al turnàr acsè in manicòmi. La Mary però, stand-ag davśèṅ, la vrév dar-'g un taj parchè la n vōl piò far-ag dal mâl. La taca acsè a litgàr cun sò màdar che però l'è 'n bric e la gh vōl andàr a fónd anc parchè la capìs ch'a gh manca pôc par spìnś'r incóra Norman in dla matéria. La Lila la partìs acsè p'r andàr a cà 'd Norman e la pasa par la cantìna, in dua l'à lugâ i vistî da vècia e la pirùca cun i cavìi griś, par turnàr a far la part dla sgnóra Bates. In dal méntar ch'la i tōś però a salta fóra na figùra vistìda cuma la màd'r ad Norman ch'la gh insfìlsa un curtlàs in dla bóca.

In cal méntar la Mary, pintìda ad qvél ch'l'à fat insém a sò màdar, la cònta incòsa a Norman sprand che lò al s cunvìnsa 'd èsar guarî. Anc i dutōr i próan a far-al ragiunàr, tirànd fóra da la fòsa al cadàvar dla sgnóra Bates par far-ag védar ch'l'è mòrta dabòṅ. Ma Norman al n in vōl savér e al taca a dascórar incóra a 'l telèfun cun sò màdar, a sò dita. Daspràda la Mary la và subìt in cantìna par mét'r-as adòs i pagn dla Bates e p'r urdnàr a Normar ad métar śò subìt la curnéta, anc parchè se lē la gh stà davànti, la n pōl minga ès'r anc a 'l telèfun. Ma Norman al n gh dà briśa a mènt.

Culegamènt estéran