Psycho

Da Wikipedia.

C'l artìcul chè 'l è scrit in Miranduléś Emiliàn

Psycho
Psycho

Vince Vaughn in na figùra dal film
id.
1998
Regìa: Gus Van Sant
Scritōr: Robert Bloch • Joseph Stefano
Atōr: Vince VaughnJulianne MooreAnne Heche
Viggo MortensenWilliam H. MacyRobert Forster
FleaPhilip Baker HallChad EverettAnne Haney
Müsica: Bernard Herrmann
Léngua: Ingléś
Dürä dal film: 103 minüt
Nasiōṅ: Stat Unî


«
Férm-at. Mét-at còmad e pònsa. Fà't na dócia.»
(Tagline dal film)


Psycho (id.) 'l è 'n thriller americàṅ dal 1998 ad Gus Van Sant, arfacimènt a culōr figùra par figùra dal caplavōr 'd Alfred Hitchcock dal 1960 Psyco.

'L è custâ ssanta migliòṅ ad dòlar ma al 'n à fat sù pôc da piò dla mità, trénta-sèt.

Sunt

Al set ad Psycho a Hollywood
Al Bates Motel

La Marion Crane (Anne Heche), na segretària ch'la tîṅ a drē a i cònt dn'aśiénda ad Phoenix (Ariśòna) ch'la vénd dal , la ruba i quatarsènt-mila dòlar ch'la gh'iva da purtàr al dè dòp in banca par cònt dal sò cap George Lowery (Rance Howard) e la scapa via in màchina cun i bèsi sèg. Dòp un dè e mèś ad viàś, tòlta da la stufìśia, la s férma a punsàr in dal motel ad Norman Bates (Vince Vaughn), un put ch'al viṿ da par lò insém a sò màdar, na dóna scarabùtica e bòna sōl a dar-ag di órdan, in na vila lè atàc.

Cla sira lè, méntar la Marion l'è drē a far-as na dócia, na dóna ch'la par la sgnóra Bates la s insfìlsa dént'r al bagn dla sò cambra e la la scurtèla a mòrt. Quànd più tard Norman al la véd, tòlt da paùra e scarésa, par diféndar sò màdar, al decìd ad scanślàr tut al trasi e ad lugàr al sò cadàvar, faghénd sparìr incòsa ma sénsa savér che lē la gh'iva da na banda cal muć ad bèsi là.

Soquànt dè dòp, a n catànd-la piò, la surèla dla puvréta, Lila (Julianne Moore), la và a dmandàr nutìsi da 'l amànt ad chi lē, Sam Loomis (Viggo Mortensen), ma gnanc lò al sà gnint.

In pinsēr par la Marion chi dū lè i tàcan a pascàr-la, pròpria cuma 'l detective privâ Milton Arbogast (William H. Macy) pagâ da Lowery ch'al vliva indrē i sò bèsi. Rivâ a 'l Bates Motel 'l investigadōr al capìs subìt che lè a gh'è quèl ch'a traśa e al decìd 'd andàr a dascórar cun la sgnóra Bates parchè Norman al gh s éra mis còntar. Ma quànd al và in cà, la dóna ch'l'iva cupâ la Marion la gh dà adòs tirànd-ag na scurtlàda in sal grugn, faghénd-al strabucàr śò da 'l scali, par pò masàr-al.

Subìt dòp Sam e Lila, ch'i ìvan dascórs a 'l telèfun cun Arbogast prima ch'al murìs, i rìvan là anc lōr e i dmàndan na cambra faghénd finta 'd èsar marè e mujér. Méntar Loomis al pèrd dal tèmp in dla hall cun Norman, Lila la và in dla vila par pascàr la véra ma Norman al capìs incòsa e al cur in cà anca lò par farmàr-la. La dóna la s lóga subìt in cantìna e lè la véd na vècia sintàda in sna pultróna. Quànd la prila la scrana però la véd ch'a s trata 'd un cadàvar mumificâ.

Culegamènt estéran