Jean-Pierre Cassel

Da Wikipedia.
C'l artìcul chè 'l è scrit in Miranduléś Emiliàn
Jean-Pierre Cassel tòlt śò a Cannes in dal 1992


Jean-Pierre Crochon, cgnusû méj in dal mónd dal spetàcul cuma Jean-Pierre Cassel (Parì, 27 'd Utóbar dal 1932 - Parì, 19 'd Avrìl dal 2007), 'l è stâ 'n atōr francéś, pàdar ad Vincent Cassel e nòn ad Monica Bellucci.

Biugrafìa

Cassel al taca a lauràr da śóvan in dal mónd dal spetàcul cuma balarèṅ ad tip-tap faghénd la còntarfigùra ad Gene Kelly durànt na sò tournée in Frància. In di an Sinquànta 'l à fat soquànti cumèdi a teàtar par Philippe de Broca, girànd sèg pò anc di film.

Al sò primi parti impurtànti i rìvan però cun Jean Renoir (Le strane licenze del caporale Dupont dal 1962, Al strani licénsi dal capurâl Dupont), René Clair (Parigi brucia? dal 1966, Parì bruś'-la?) e Claude Chabrol (I sette peccati capitali dal 1962, I sèt pcâ capitài) in soquànti pelìculi di an Ssanta.

In di an Stanta al gira Il fascino discreto della borghesia (La blésa discréta dla burgheśìa, 1972) par Luis Buñuel, Assassinio sull'Orient Express (Masamènt in s'l Orient Express, 1974) par Sidney Lumet e Qualcuno sta uccidendo i più grandi cuochi d'Europa (Qualchidòṅ 'l è drē a cupàr i cōg più grand 'd Europa, 1978) par Ted Kotcheff.

Al gira pò di film dramàtic, cuma La giacca verde (Al giubét vérd) dal 1980 e La truite (La truta) dal 1982 cun l'Isabelle Huppert e la Jeanne Moreau, e soquànt film in Itâglia cuma Nudo di donna (Nûd ad dóna) ad Nino Manfredi, Il giovane Toscanini (Al śóvan Toscanini) ad Franco Zeffirelli e Fantaghirò ad Lamberto Bava.

In di An Nuànta al vèṅ ciamâ da Robert Altman par dū sò film, Vincent e Theo (1990) e Prêt-à-Porter (1994). In dal 2000 'l è in dal cast dal film I fiumi di porpora (I fiùm ad pórpura) ad Mathieu Kassovitz.

'L à anc tòlt part in tri film dedicâ a i Tri Muschetér girâ par Richard Lester.

Par Claude Chabrol al gira siē film: I sette peccati capitali (I sèt pcâ capitài, 1962), Le più belle truffe del mondo (I più bèi imbròj dal mónd, 1964), All'ombra del delitto (A l'òra dal masamènt, 1970), Pazzi borghesi (Burghéś mat, 1976), L'inferno (’L Inféran, 1994) e Il buio nella mente (Al buj in dla mènt, 1995).

Jean-Pierre Cassel al mōr ad càncar a 75 an quànd incóra al s dava da far in dal cìnema.

Filmugrafìa (minga cumpléta)

Culegamènt estéran