Gerard Piqué

Da Wikipedia.

C'l artìcul chè 'l è scrit in Miranduléś Emiliàn


«
Nosaltres ni ens droguem, ni ens tirem, ni comprem àrbitres, només juguem al futbol.»
(CA)(Dichiarasiòṅ in Catalàṅ a 'l Camp Nou còntra Mourinho dòp avér vins la Cópa di Campiòṅ, 30/05/2011)
«
Nuàtar a n s drughém minga, a n tirém minga, a n cumprém minga gl'àrbitar, a śughém a 'l futbol e basta.»
(MUD)
Piqué cun la maja dla Spaggna

Gerard Piqué Bernabéu (Barcelóna, 2 ad Favràr dal 1987, a s lèś [ʒəˈɾaɾt piˈke βəɾnəˈβew] in catalàn e [ɟʝeˈɾaɾ piˈke βeɾnaˈβeu] in spagnōl) 'l è un śugadōr ad balòṅ spagnōl, difensōr dal Barcelóna e dla nasiunàl dal sò paéś.

In dla sò caréra 'l à vins, fra i àtar, tri scudét in Spaggna cun la maja blau-grana, un campiunâ ingléś c'n al Manchester United, tri cópi di campiòṅ (dū c'n al Barça e una c'n al Manchester) e i mundiài ad fólbar cun la Spaggna in dal 2010.

Fiól 'd 'n avucàt e dna diretōra 'd uśdàł, 'l è élt 192 cm e 'l péśa 85 chilo. 'L è spuśâ cun la cantànta culumbiàna Shakira.

Biugrafìa

Gl'inìsi

Uriginàri dla Catalógna, in dal 1997 a déś an al taca a far part dal setōr di śōvan dal Barcelóna e al gh armàgn soquànt an in fiṅ a ch'al Manchester United 'l al tōś sèg in dal 2004 faghénd-ag firmàr al sò prim cuntràt da prufesiunìsta.

In dū an al śōga sō déś partìdi in tut c'n i Red Devils (i diàvui rós) dòp ad chè al vîṅ mandâ in prèst a 'l Saragòsa. Cun gl'Aragunéś al śōga vint-a-dū partìdi e 'l fà anc 2 gòi. 'L è acsè che gl'ingléś i al vōl'n indrē par la stagiòṅ 2007-2008.

Al vìnsidi cun al Machester United

Gerard Piqué cuntènt cun la mdaja 'd òr a 'l còl dòp ch'l à vins la finàl dla Cópa di Campiòṅ dal 2009 a Róma

Turnâ in Inghiltèra, par Piqué a gh'è incóra pôc spasi fra i titulàr. Gerard al s pōl mét'r in luś in Champions League in du 'l fà dū gòi cóntar la Dinamo Kiev e la Roma.

I an c'n al Barça

Tgnû pôc in cunsiderasiòṅ in dla sò squàdra, Piqué al decìd ad turnàr in Spaggna firmànd par quat'r an c'n al Barcelóna. In dla stagiòṅ 2008-2009 Gerard al vins incòśa, Campiunâ, Cópa dal Rè e Champions League, śugànd quarànta-sinc partìdi e sgnand tri gòi. 'L an dòp al fà 'l pîṅ c'n al Supercópi Européa e Spagnōla e vinsénd anc la Cópa dal Mónd par club.

Al 26 ad Favràr dal 2010 Piqué al ślunga ìl cuntràt in fîṅ a 'l 2015. C'n al Barça al riva in semifinàl in dal Cópa di Campiòṅ ma 'l vîṅ batû par l'Inter ch'la vinsarà pò la Cópa. Piqué al séggna 'l gòl dla vitòria in dal ritóran ma a n è mia asè p'r arbaltàr al riśultâ. Ma la fèsta l'è sōl rinviàda a 'l an dòp quànd al catalàṅ al vins la sò tèrsa Cópa di Campiòṅ, sèmpar cónt'r i sò vèć cumpàgn dal Manchester United al 28 ad Maǵ dal 2011.

Cun la nasiunàl dal sò paéś al vins da titulàr la Cópa dal Mónd in Sudafrica in dal 2010 cóntar l'Ulànda in finàl, acsè cuma 'l iva prevìst al fōlp Paul.

Culegamènt estéran