Donna Summer

Da Wikipedia.
C'l artìcul chè 'l è scrit in Miranduléś Emiliàn


«
What would I have to do to get you to notice me too? Do I stand in line, one of a million, admiring eyes? Walk a tightrope way up high, write your name across the sky, I'm going crazy just to let you know, you'd be amazed how much I love you so baby, when I get my hands on you I won't let go, this time I know it's for real. Should I write or call your home, shout it out with a megaphone, radio, TV news, got to find a way to get my message to you, to say I love you with a neon sign, anything to make you mine.»
(EN)(This time I know it’s for real, 1989)
«
Cuśa gh'ò-j-a da far par far in manéra ch'ta m but i òć adòs anca te? Gh'ò-j-a da star in cóa, una còntra 'n migliòṅ, guardànd-at in di òć? Giràr in sal fîŀ dal raśōr, scrìvar al tò nóm in sal cēl, a sòṅ drē a dvintàr mata sōl par far-at savér, ta gh armarév savénd quànt a t vój bèṅ, quànt ad metarò al maṅ adòs a n t lasarò minga scapàr via, 'sta vòlta a 'l sò ch'l'è par dabòṅ. Gh'ò-j-a da scrìvar o ad ciamàr-'t a cà, sigàr-al a 'l megàfun, a la ràddio, a 'l nutisiàri dla TV? A gh'ò da catàr la manéra ad far-'t arivàr al mè mesàǵ, par dir-at ch'at vój bèṅ cun n'inséggna a 'l nèon, incòsa par far-at mio.»
(MUD)
La Donna Summer tòlta śò durànt al cuncèrt dal Nobel Peace Price dal 2009


La LaDonna Andre Gaines, cgnusùda méj cuma Donna Summer (Boston, 31 ad Dicémbar dal 1948 – Venice, 17 ad Maǵ dal 2012), l'è stàda na cantànta americàna. I gh'ìvan dâ al scutmâj ad Queen of Disco par via di sucès muśicài da discutéca di an Stanta.

Biugrafìa

La LaDonna Andre Gaines la nas la nòt ad San Silvèstar dal 1948 a Boston, tèrsa ad sèt fiōi. In dal 1968 la lasa cà par stablìr-as in Germâgna in dua l'iva catâ 'n pòst par lauràr in dla versiòṅ tedésca dal musical Hair. La sa spóśa cun Helmut Sommer, cgnusû a Mònac ad Bavéra, e sèg la gh'à na fiōla, Mimi. Donna la decìd ad tōr al nóm 'd art ad Summer ch'al sarés la tradusiòṅ in ingléś ad Sommer (al vōl dir Istâ).

In dal 1974 la taca a lauràr insém a 'l itagliàṅ Giorgio Moroder (ch'al gh scrivarà dimóndi canti famóśi), e la rigìstra al sò prim braṅ ad sucès, The Hostage, mis dèntar a 'l LP Lady of the Night.

'L an dòp l'è la vòlta ad Love to Love You Baby par la sò cà discugràfica nóva, la Casablanca Records. Al sìngul umònim l'è pasâ a la stòria par la sò vóś, pîna ad śnum da ninéta.

La Summer in d'l Agóst dal 2005

In dal 1977 la canta òṅ di sò braṅ più famóś, I Feel Love, sìngul dal disc I Remember Yesterday. In dal nòstar paéś ch'la cansòṅ lè la rèsta par daśdòt stmani in di prim déś pòst in clasìfica, dvintànd anc al quìnt 45 gir più vindû d'l an. Di àtar artìsta, in di an sucesìṿ, i l'aṅ cantànda anca lōr: Madonna, Whitney Houston, Robbie Williams, Moby e anc John Frusciante di Red Hot Chili Peppers.

Ma i sucès par lē i n finìsan minga lè. Difàti in dal 1979 'l è al tùran 'd Hot Stuff (mis dèntar a 'l àlbum Bad Girls) ch'al gh dà 'n Grammy Award e 'l è famóś anc p'r èsar stâ druâ in dal film Full Monty quànd di sénsa lavōr ad Sheffield i s càvan śò dal tut in frònt a dal dóni par catàr sù di bèsi.

La cantànta la dvénta la prima artìsta a piasàr tri àlbum dópi ad fila a 'l prim pòst quànd la fà gnir fóra On the Radio.

In dal 1980 la pasa a la Geffen Record ch'la gh fà mulàr lè Moroder e Bellotte par pasàr cun Quincy Jones. Insém a lò la fà gnir fóra al disc Donna Summer, cun dèntar i braṅ Love Is in Control (Finger on the Trigger), The Woman in Me e State of Independence. Par lē quél lè l' è pròpria un perìud ad cambiamènt parchè la sa spóśa par la secónda vòlta, cun al cantànt di Brooklyn Dreams, Bruce Sudano.

In di prim an Utànta la sò stéla la sa śmòrsa un pôc par pò turnàr a brilàr incóra cun She Works Hard For The Money e al sìngul This Time I Know It's for Real dal 1989.

In di an Nuànta la sarnìs ad far di duét (òṅ cun la Liza Minnelli ma anc cun la Barbra Streisand) e dal cover (la canta anc Con te partirò 'd Andrea Bocelli).

In dal 2004 la gh la cava a finìr in dla Dance Music Hall of Fame, insém a i Bee Gees e a Barry White.

Malàda da tèmp 'd un càncar a i palmòṅ, la Donna Summer la mōr al 17 ad Maǵ dal 2012, a ssanta-tri an, in dla sò cà a 'l mâr davśèṅ a Venice, in sla còsta òvest dla Flòrida, quànd incóra l'éra drē a lauràr a 'n àlbum nóṿ[1].

Discugrafìa

Àlbum e Racòlti

  • 1974 Lady of the Night
  • 1975 Love to Love You Baby
  • 1976 A Love Trilogy
  • 1976 Four Seasons of Love
  • 1977 I Remember Yesterday
  • 1977 Once Upon a Time
  • 1978 Live and More
  • 1979 Bad Girls
  • 1979 On the Radio - Greatest hits
  • 1980 The Wanderer
  • 1982 Donna Summer
  • 1983 She Works Hard for the Money
  • 1984 Cats Without Claws
  • 1985 The Summer Collection
  • 1989 Another Place and Time
  • 1991 Mistaken Identity
  • 1994 Endless Summer - Donna Summer's greatest hits
  • 1994 Christmas Spirit
  • 1996 I'm a Rainbow (rigistrâ in dal 1981)
  • 1999 Live and More... Encore
  • 2003 The Journey - the very best of donna summer
  • 2008 Crayons

Nòti

Culegamènt estéran