Videocracy - Basta apparire

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Videocracy
Videocracy - Basta apparire
Videocracy - Basta apparire.png
Na figùra dal film
Vìddeo-crasìa - 'L è abàsta figuràr
2009
Regia: Erik Gandini
Scritùr: Erik Gandini
Atùr: Riccardo CanevaliLele MoraFabrizio Corona
Marella GiovannelliSilvio BerlusconiSimona Ventura
Müsica: /
Lengua: ItagliàṅIngléś
Dürä dal film: 85 minüt
Nasiòṅ: ŚvèsiaDanimàrcaRégn UnîFinlàndia


«
30 an fà in Itàglia 'n esperimènt televiśìṿ piculèṅ 'l à fat tacàr na rivulusiòṅ culturàla.»
(Tagline dal film)


Videocracy - Basta apparire (Vìddeo-crasìa - 'L è abàsta figuràr) 'l è 'n ducumentàri dal 2009 scrit e dirèt p'r al bergamàsc emigrâ in Śvèsia Erik Gandini. La pelìcula l'è stada preśentàda a 'l 66śum Fèstival ad Venèsia in dla sesiòṅ dal „Giurnàdi di Aṿtōr“.

La Rai e la Mediaset i s èṅ rifiutàdi 'd traśmét'r al trailer, la prima pinsànd ch'al film al dis cónt'r a 'l guèran e che dònca al gh'is biśógn 'd un mesàǵ ad ségn cuntràri par garantìr l'imparsialità dal servìsi pùblic, la secónda par via dal crìtichi a la televiśiòṅ privàda.

Sunt

Al ducumentàri al fà n'anàliśi dla televiśiòṅ in Itàglia di ùltim trént'an, da quànd i èṅ nadi qvéli privàdi in fiṅ a la Mediaset dal prim minìstar Silvio Berlusconi, e su i mecanìśum ch'i lìg'n i cumpurtamènt, i custùm e 'l sarnìdi dla gint rispèt a i prugràma televiśìṿ esénd la TV al mèś 'd infurmasiòṅ magiuritàri par l'upiniòṅ pùblica.

A s partìs c'n al prugràma di an Stanta dna televiśiòṅ turinéśa, Spogliamoci insieme, in dua la gint da cà la telefunàva in studi (un bar) par rispónd'r a di quiz e, s'la gh ciapàva, na ragàsa la s cavàva śò. A s cuntìnua pò cun L'ìśula di famóś dla Simona Ventura, Cōlp Grôs 'd Umberto Smaila, al Gran Fradèl dla Barbara D'Urso e La Spóśa Parfèta 'd Cesare Cadeo e dla Roberta Lanfranchi in dū dal màd'r ad śōvan put i gh'ìvan da sarnìr la mujēr giùsta p'r i sò fiōi, ch'la saìs lavàr śò, far da magnàr, dasparciàr e sèmpar surìd'r a sò marè. In cal prugràma chè, fra i spetadōr, a gh'è anc 'l uperàj Riccardo Canevali, un ragàs ad Brésa ch'al vrév tant lauràr in TV anca lò, esénd a sò dita 'n misćiùs fra Jean-Claude Van Damme e Ricky Martin.

In séguit i ciàpan la paròla 'l agìnt di VIP Lele Mora, ch'l è argujóś 'd ès'r un fan ad Benito Mussolini tant ch'al gh'à 'l sunarìi dal fasìśum su 'l sò telefunèṅ, e 'l “rè di paparàś” Fabrizio Corona ch'in cal méntar, pasànd dal vòlti in parśòṅ e batśànd-as cuma 'n Robin Hood mudéran ch'al ruba i bèsi a i ric par tgnir-'s-i lò, 'l è dvintâ 'n “persunàǵ” a sò vòlta ch'l à fat i migliòṅ esénd ch'i al vōlan tut, in televiśiòṅ e in dal discutéchi. I sàltan sù anc dimóndi śuvnòti ch'i tōśan part a di pruvèṅ in gir par l'Itàglia par dvintàr “velìni” esénd ch'al sò sógn 'l è qvél ad spuśàr di śugadōr ad fólbar.

Culegamènt estéran