Via da Las Vegas
|
C'l artìcul chè 'l è scrit in
Miranduléś |
 Leaving Las Vegas
| ||
| Via da Las Vegas | ||
 L'Elisabeth Shue e Cage in na figùra dal film | ||
| id. 1995 | ||
|---|---|---|
| Regìa: Mike Figgis | ||
| Scritōr: John O'Brien • Mike Figgis | ||
| Atōr: Nicolas Cage • Elisabeth Shue • Kim Adams Julian Sands • Richard Lewis • Steven Weber Emily Procter • Valeria Golino • Thomas Kopache Danny Huston • Paul Quinn • Graham Beckel Marc Coppola • Julian Lennon • R. Lee Ermey | ||
| Müsica: Mike Figgis | ||
| Léngua: Ingléś • Rus | ||
| Dürä dal film: 111 minüt | ||
| Nasiōṅ: Stat Unî | ||
Via da Las Vegas (id.) 'l è 'n film dramàtic americàṅ dal 1995 ad Mike Figgis trat da 'l rumànś umònim ad John O'Brien ch'al s è tòlt la vita in dal 1994 a trénta-quàt'r an prima ch'al film al vgnis fóra. Par cla pelìcula chè Nicolas Cage 'l à vins al Prèmi Òscar cuma atōr prutagunìsta méntar l'Elisabeth Shue e Mike Figgis, ch'al firma anc la culòna sunóra cun di pès ad Sting e ch'in dal film al fà la part 'd un mafióś, i aṅ ciapâ na nomination.
Al film cun Joseph Cotten e l'Alida Valli ch'i dū prutagunìsta i guàrd'n in pisìna 'd nòt 'l è Il terzo uomo. Cl'òpra chè l'à fat sù da piò 'd trénta-dū migliòṅ ad dòlar esénd-an custàda sōl siē.
Sunt
Ben Sanderson (Nicolas Cage) 'l è 'n óm ch'l à pardû incòsa, prima la sò famìja e pò 'l lavōr ad senegiadōr. Puòs sénsa critèri, al decìd 'd andàr a Las Vegas par fugàr i sò daspiaśēr in dla butìglia e p'r imbariagàr-as in fiṅ a murìr, quàtar stmani i pōl'n anc ès'r abàsta. Par pagàr-as la cambra e 'l bévar al dróa i bèsi dla liquidasiòṅ e pò al vénd via via la sò ròba, al sò rolex e la màchina.
Na sira 'l incróśa par strada na scaja ciamàda Sara (Elisabeth Shue) e 'l gh śibìs sinc-sènt dòlar par pasàr la nòt insém ma anc, e specialmènt, par dascórar. La Sara l'armàgn sèg in fiṅ a la matìna ma pò, avénd muciâ sù pôc, la i ciàpa da 'l sò papòṅ lètun Yuri Butso (Julian Sands) ch'l è vgnû a pascàr-la in dla sità dal visi dòp che lē l'éra scapàda via da lò a Los Angeles. In séguit Yuri al la manda via par prutéś'r-la parchè al sà che di mafióś pulàc i gh l'ànan sèg e difàti chi lōr i al cópan subìt dòp. La ragàsa la tórna da Ben, ch'al l'iva invidàda a séna, e piàn piàṅ fra i dū a nas quèl.