Una coppia in affari

 Miranduléś

C'l artìcul chè 'l è scrit in Miranduléś

Flip or Flop
Una coppia in affari
Na còpia in afâr 2013/2020
Gènar: Docureality
Stagiòṅ: 9
Epiśòdi: 130
Regìa: Kelly Weinhart Sergio Coronado • Michael Pando
Scritōr: Joel Garber • Kylie Hodges Ki Whelan • Jason Ikeler • Michael Pando
Atōr: Tarek El Moussa • Christina Meursinge Haack Israel Battres • Pete de Best • Kayla de St. Jean Jeff Lawrence • Rudy Battres • Taylor El Moussa Brayden El Moussa • Frank Miller • Kevin Htain Steve Cederquist • Jake Rigel • Daniel Messina Jesse Escalera • Natalie Moreno • Tony Perez
Mùśica: Damien Starkey • Kenny Moron Julie Carpenter • Udi Harpaz • Eric Lee Harper
Duràda: 21 minùt
Léngua: Ingléś
Nasiòṅ: Stat Unî

«

A m ciàm Tarek, lì lē l'è mè mujēr Christina e a sém di agìnt imubiliàr. Cun la criśi dal marcâ imubiliàr e na famìja da mantgnìr, la strada l'è stada tuta a l'élta acsè a-j-ém tacâ 'n mistēr nóṿ, véndar dal cà pignuràdi. A cumprém dal cà in cuntànt sénsa gnanc védar-li, soquànti i gh'aṅ biśógn ad ristruturasiòṅ fàcili ma dgl'atri i èṅ da tiràr śò dal tut. A n saém mai cuś a cumprém in fiṅ tant ch'a n pasém mia 'l us ad cà.»

(Tagline dla prima stagiòṅ)

Una coppia in affari (Na còpia in afâr) 'l è 'n docureality americàṅ dal canàł HGTV ch'al dascór dna còpia 'd agìnt imubiliàr ad Yorba Linda in dla cuntèa 'd Orange (sud dla Califòrgna), Tarek El Moussa e la Christina Meursinge Haack, ch'i còmpran dal cà da giustàr par pò èsar vindùdi misi a nóṿ par ciapàr di bèsi. Da spés a gh và bèṅ mo dal vòlti pròpria minga e i gh armétan.

Chi lōr, ch'i aṅ divursiâ in dal Śnar dal 2017 anc s'la traśmisiòṅ la và avànti listés, i gh'aṅ dū fiōi, la Taylor e Brayden, chi lò nâ cun l'inseminasiòṅ artifisiàla dòp che Tarek 'l è stâ custrét a ślar e a tgnir dacàt dla sò śbòra par via 'd un càncar a i maròṅ e a la tiròid vgnû fóra in dal 2013 quànd 'l è andâ a far di eśàm parchè na spetadōra, infarméra 'd mistēr, 'l iva fat a mènt ch'al gh'iva 'l còl infiâ.

Al prugràma

In di an Dumìla Tarek El Moussa e sò mujēr, la Christina Meursinge Haack, i fàvan gl'agìnt imubiliàr ma pò a gh'è stâ 'l strabùc dal marcâ dgl'abitasiòṅ in dal 2008 ch'al gh'à tajâ 'l gambi. In dal 2011 Tarek 'l à decìś acsè ad cambiàr in part mistēr tacànd un lavōr ad giustadùri 'd cà da véndar misi a pòst a 'n prèsi più élt ad qvél ch'i ìvan pagâ par cumpràr-li. El Moussa 'l à pò dmandâ a 'n sò amìg a jutàr-'l a far avēr a qvéi dal canàł televiśìṿ HGTV na caséta in du 'l fava védar na sò ristruturasiòṅ da 'l inìsi a la fiṅ. In dal 2012 i aṅ firmâ un cuntràt par giràr na stagiòṅ dal prugràma.

Da 'l sò bandi, in pòst cuma Long Beach, Garden Grove, Cypress, Santa Ana, Whittier e Anaheim, al cà i èṅ da spés di vilèṅ su 'n piàṅ sōl cun giardèṅ e dal vòlti anc la pisìna e i cóst'n un muć ad bèsi.

In dal docureality la Christina, ch'la gh'à 'l ciòld fis dal cuśìni open space parchè par lē i èṅ al cuśìni e i cèso a far vénd'r al cà, la tîṅ adrē specialmènt a 'l design e a sarnìr i materiài méntar sò marè 'l è impgnâ da piò in di cantēr in du 'l ciàma di custrutōr estér'n a far i lavōr, tacànd da Daniel Messina in di prim epiśòdi par pò pasàr a Israel Battres, Jeff Lawrence, Frank Miller e Steve Cederquist. Gl'alestimènt di mòbii i èṅ curâ par Kevin Htain, par la Kayla de St. Jean, par la Natalie Moreno e par la Natalie Putnam. Quànd a gh'è da mét'r a pòst i giardèṅ, la còpia la ciàma da spés un specialìsta in cal camp lè di estéran, Jesse Escalera.

Tarek El Moussa

La Christina Haack

In dal primi puntàdi la còpia la cumpràva 'l cà a l'asta, da spés sénsa gnanc psēr-li védar dèntar. Quànd 'l éra pusìbil, i dū i andàv'n in sal sit par pruàr a śbraghiràr dènt'r ad nascòst o a guardàr par la fnèstra, s'i 'n catàv'n una vèrta sénsa scûr.

P'r avēr i bèsi p'r i lavōr, Tarek al dmandàva dal vòlti quèl in prèst a i suo o sinò a 'l sò culéga Pete de Best in cambi ad frut o faghénd a mèś su i guadàgn finài.

Riscóntar

Al prugràma, tacâ in dal 2013, al gh'à abû sucès tant ch'al và incóra avànti cun la nòna stagiòṅ e soquànt spin-off ambintâ anc in àtar stat americàṅ.

I crìtic dla traśmisiòṅ i dàn'n adòs a la Christina dgénd ch'la dascór cuma na valley girl, ch'la và a lauràr c'n i tac trucàda cuma s'la gh'is 'd andàr a na sfilàda, ch'l'è bòna sōl ad sarnìr i para-spric dla cuśìna e ch'al sò cà i pàran sèmpar tuti cumpàgni. A Tarek i n gh pardónan briśa ch'al vaga in gir sèmp'r in bragtìni e in savàti e ch'al n è mia bòṅ ad far al mistēr dal muradōr, a part śbragàr a śmartlàdi 'n quàlc mòbil o a stablìr na quàlc matunèla a 'l mur.

Culegamènt estéran

• (EN) La schéda dla prugràma in s'l IMDb

Nòti