Un marito ideale (film 1999)
|
C'l artìcul chè 'l è scrit in
Miranduléś |
 An Ideal Husband
| ||
| Un marito ideale | ||
.png) La Julianne Moore e Everett in na figùra dal film | ||
| Un marè ideàł 1999 | ||
|---|---|---|
| Regìa: Oliver Parker | ||
| Scritōr: Oscar Wilde • Oliver Parker | ||
| Atōr: Rupert Everett • Cate Blanchett • Ben Pullen Julianne Moore • Jeremy Northam • Peter Vaughan Minnie Driver • Marsha Fitzalan • Lindsay Duncan | ||
| Müsica: Charlie Mole | ||
| Léngua: Ingléś | ||
| Dürä dal film: 97 minüt | ||
| Nasiōṅ: Régn Unî | ||
Un marito ideale (Un marè ideàł) l'è na cumèdia ingléśa e americàna dal 1999 'd Oliver Parker trata da la cumèdia umònima in tri at 'd Oscar Wilde. Par cla pelìcula chè, preśentàda fóra cuncōrs a 'l 52śum Fèstival ad Cannes, la Julianne Moore e Rupert Everett i èṅ stâ numinâ a i Golden Globe dal 2000.
Custâ siē migliòṅ e tri ad sterlìni, al film 'l à pò purtâ a cà da piò ad daśdòt migliòṅ ad dòlar in tut al mónd.
Sunt
La puta Mabel Chiltern (Minnie Driver) l'è inamuràda 'd Lord Arthur Goring (Rupert Everett), un bèl milurdèṅ bòṅdagnìnt che sò pàdar Lord Caversham (John Wood) al próa in tut al manéri a mét'r a pòst sénsa però cavàr-'g-la. Chi lē l'è la surèla 'd Sir Robert Chiltern (Jeremy Northam), qvél ch'a s diś un bòṅ partî parchè al fà 'l sót-segretàri a 'l Ministēr di Èstar. 'L óm 'l è spuśâ cun la Lady Gertrude (Cate Blanchett), na sgnōra cum a ś dév ch'la s dà da far p'r i dirìt ad cal dóni. Chi lōr dū, rispetâ da tut in sucietà, i vìv'n in na cà da sgnuròt a Lóndra insém a la Mabel.
Na sira, a 'n bal urganiśâ da i Chiltern, a riva anc cuma òspit la sgnōra Laura Cheveley (Julianne Moore), na rósa 'd cavìi ch'la vōl dvintàr na qualchidùna e sistemàr-as par la vita spuśànd di óm pîṅ ad bèsi, prima 'l baròṅ Arnheim (Jeroen Krabbé) e pò, a la sò mòrt, 'n óm incóra più ric. Armàśa védva par la secónda vòlta, la dóna la s è però magnàda incòsa cun di investimènt śbaliâ fat in Argintìna.