Tutti al mare (film 2011)

Da Wikipedia.

C'l artìcul chè 'l è scrit in Miranduléś Emiliàn

Tutti al mare

Franco Pistoni e l'Ambra in na figùra dal film
Tut a 'l mâr
2011
Regìa: Matteo Cerami
Scritōr: Matteo Cerami • Vincenzo Cerami
Atōr: Marco GialliniGigi ProiettiIlaria Occhini
Anna BonaiutoNinetto DavoliClaudia Zanella
Ambra AngioliniRodolfo LaganàPippo Baudo
Valerio MastandreaOlha OhuraGiorgio Gobbi
Franco PistoniClarita GattoVincenzo Cerami
Marlene Ngo MomhaEnnio Fantastichini
Andebrahan AbrhamLibero De Rienzo
Sergio FiorentiniFrancesco Montanari
Müsica: Nicola Piovani
Léngua: ItagliàṅGiapunéśÀrabTedésc
Dürä dal film: 100 minüt
Nasiōṅ: Itàglia


«
Dòp trént'an e pasa, Matteo Cerami al tórna su i sit in dua sò pàdar Vincenzo 'l iva firmâ la senegiadùra dal mìtig Caśòt ad Sergio Citti
(Tagline dal film)


Tutti al mare (Tut a 'l mâr) l'è na cumèdia itagliàna dal 2011 ad Matteo Cerami.

Al film al tōś spunt da na pelìcula dal 1977 senegiàda par sò pàdar Vincenzo, Casotto, in du i recitàvan Gigi Proietti e Ninetto Davoli, prutagunìsta anc ad cal film chè.

Sunt

Al sgnōr Maurizio (Marco Giallini) 'l è 'n put titulàr 'd un bar, al „Pés frésc chez Maurice“, su la spiàgia lasiàla ad Castèl Pursiàṅ. Faghénd-as jutàr par dal persunàł èxtra-cumunitàri, al bagnèṅ Piotr (Victor Palynsky), la camaréra Fatima (Marlene Ngo Momha), al cinéś Confù (Hal Yamanouchi) ch'al fà i sfrēg a i cliènt, al barìsta Omar (Simon Makkhonen) e al camarēr Khaled (Andebrahan Abrham), al vèra 'l stabilimènt cuma tut i dè, purtànd-as sèg anc sò màdar Valeria (Ilaria Occhini) ch'l'è ardùta a vìvar su na scrana a rudèli e ch'la gh stà sèmp'r adòs. A purtàr-'g al pés, che lò al vénd par frésc quànd invéci a n è mia acsè, a gh pénsa al sò amìg Alfredo (Ninetto Davoli).

A 'l sò chiòsc i rìvan subìt tanti parsòni par pasàr na giurnàda a 'l Sōl. A gh'è sò cugnâ Nino (Gigi Proietti), ch'al gh'à di prubléma a 'rcurdàr-'s i fat e ch'al gh'à anc al visi ad śgranfgnàr via dla ròba, un mat ch'al vrév tōr-as la vita (Ennio Fantastichini), un tisi ch'al pòrta sfurtùna ciamâ Geroboamo (Franco Pistoni), al fnòć Gianni (Vincenzo Cerami) insém a 'l sò papagàl ch'al n taś mai, un nunòṅ (Sergio Fiorentini) ch'al cònta sèmp'r a sò anvōd pìcul ad quànd 'l iva fat la guèra in Abisìnia, na còpia 'd lèśbichi in criśi da quànd la Sara (Claudia Zanella) l'à cuntâ a la sò muróśa Giovanna (Ambra Angiolini) ch'la gh'à d'avēr fiōl e la n sà gnanc chi al sia 'l pàdar, la star dal prugràma dal dòpmeśdèféma paś“, l’Adalgisa (Anna Bonaiuto), insém a la sò amìga pulàca Alina (Elena Radonicich) e dū śuvnòt rumàṅ, Gigi (Francesco Montanari) e Nando (Libero De Rienzo), cun la mujēr rusa stufa 'd chi lò, la Julka (Olha Ohura).

Durànt la giurnàda i rìvan lè par di cuntròi anc di agìnt dla guàrdia 'd finànsa, di vìgii e di carabinēr dal N.A.S. ch'i màgn'n a uf par srar 'n òć. A èsar fargâ i gh'èṅ anc di turìsta giapunéś, dascargâ lè da 'n tasìsta (Raffaele Vannoli) ch'al s fà dar un muć ad bèsi faghénd-ag crédar 'd èsar rivâ finalmènt a Puśìlip.

A la sira i vànan tut a cà e Maurizio al prepàra i tàvui par na séna urganiśàda da 'l preśentadōr Pippo Baudo (Pippo Baudo). La fèsta la vîṅ però farmàda da 'n śbarc ad migrànt da l'Àfrica.

Culegamènt estéran