Tutte per uno
|
C'l artìcul chè 'l è scrit in
Miranduléś |
 These Girls
| ||
| Tutte per uno | ||
 La Walsh, Boreanaz e la Lewis in na figùra dal film | ||
| Tuti p'r òṅ 2005 | ||
|---|---|---|
| Regìa: John Hazlett | ||
| Scritōr: John Hazlett • Vivienne Laxdal | ||
| Atōr: David Boreanaz • Caroline Dhavernas Amanda Walsh • Holly Lewis • Jacques Girard Colin Berry • Paul Spence • Donnell MacKenzie | ||
| Müsica: Ned Bouhalassa • Peter Hay • Polo | ||
| Léngua: Ingléś | ||
| Dürä dal film: 92 minüt | ||
| Nasiōṅ: Cànada | ||
Tutte per uno (Tuti p'r òṅ) l'è na cumèdia canadéśa dal 2005 ad John Hazlett ch'al l'à anc scrita insém a la Vivienne Laxdal.
L'è stada preśentàda a 'l Fèstival Internasiunàł dal Cìnema ad Turònt dal 2005.
Sunt
La Keira St-George (Caroline Dhavernas) l'è na ragàsa 'd darsèt an ch'la viṿ in un paiśèṅ ad pruìnsa pasànd al sò tèmp insém a 'l sò dū amìghi, la Glory Lorraine (Amanda Walsh), ch'la pénsa sèmp'r a 'l matrimòni, e la Lisa MacDougall (Holly Lewis), na patìda dal baseball c'n al ciòld fis dla religiòṅ. Par métar-'s in bisàca quèl la Keira in Istâ la vénd di panèṅ lung la spiàgia ma sò pàdar (Bill Rowat) al vrév ch'l'andìs invéci a l'università.
Un dè la Keira la vîṅ a savēr da Gordon Gruber (Donnell MacKenzie), un tisi ch'al n è minga tant un chilo, che Keith Clark (David Boreanaz), 'n óm ad trénta-dū an tut mùscui amànt dal poker ch'al dà da lauràr a la Glory par tgnir-'g adrē la sò putìna pìcula, la Jasmine (Hannah Chappell), al gh'à dal piànti 'd marijuana in dal sò giardèṅ. Insém a la Lisa la ragàsa la decìd 'd andàr a purtàr-ag via soquànti fój durànt la nòt ma quànd l'è là la véd par la fnèstra che Keith 'l è drē a gusàr-as la Glory méntar sò mujér Susan (McKenzi Scott) l'è via p'r i turn ad nòt.
La Glory, ch'la sà 'd èsar stada bcada, la s vèra cun la Keira dgénd-ag che Keith al la trata bèṅ a lèt, minga cuma chi ragasèṅ di sò an, ch'al gh vōl bèṅ e ch'l è 'l òm giùst par lē ch'la s è inamuràda dabòṅ. A n impòrta briśa ch'al sia bèla spuśâ parchè al la mularà prèst. Ma anc la Keira la gh'à butâ gl'òć adòs e na nòt, finî 'l tùran dla sò amìga, la và tant adrē cun Keith ch'la gh la cava a far-'s-al. Al dè dòp la Lisa la cunfèsa a la Keira ch'la vrév andàr a lèt cun c'l óm lè parchè s'al sò còrp al s sènt prònt a vōl dir ch'l è 'n ségn dal Sgnōr. La sò amìga, ch'invéci la 'l vōl par lē e basta, la próa a cunsiliàr-'g ad nò ma la Lisa la tira drit listés andànd a cà sua e śibénd-'g ad tgnir-'g in órd'n al giardèṅ. Mént'r i dū i dascóran a riva la Glory tuta incasàda ch'la la vrév paràr via.
Al tri ragàsi i decìdan pò ad mét'r-as 'd acòrd par spartìr-'s-al. C'n al ricàt ad vudàr al sac cun sò mujér e cun la pulisìa par via dl'“èrba” ch'al gh'à in giardèṅ, Keith 'l è custrét a 'ndàr a lèt sèg quàtar vòlti a la stmana.