The Brown Bunny
|
C'l artìcul chè 'l è scrit in
Miranduléś |
 The Brown Bunny
| ||
 Vincent Gallo in na figùra dal film | ||
| Al cunèṅ maròṅ 2003 | ||
|---|---|---|
| Regìa: Vincent Gallo | ||
| Scritōr: Vincent Gallo | ||
| Atōr: Vincent Gallo • Chloë Sevigny • Eric Wood Elizabeth Blake • Anna Vareschi • Mary Morasky Cheryl Tiegs • Jeffrey Wood • Rick Doucette | ||
| Müsica: John Frusciante e àtar | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî • Giapòṅ | ||
The Brown Bunny (Al cunèṅ maròṅ) 'l è 'n film dramàtic americàṅ e giapunéś dal 2003 scrit, dirèt e prudót par Vincent Gallo ch'l è anc al prutagunìsta dla pelìcula.
Al film 'l è stâ preśentâ in cuncōrs a 'l 56śum Fèstival ad Cannes in du 'l à fat scàndal par la séna finàla dal buchèṅ ch'la gh'à tirâ dabòṅ la Chloë Sevigny, in alóra la sò muróśa. Par cal fat chè la Kirsten Dunst e la Winona Ryder, ch'i gh'ìvan da far la part dla Daisy, i s èṅ tiràdi indrē. Dòp al fèstival la pelìcula, ch'l'à frutâ in tut quatarsènt-mila dòlar, l'è stada scurtàda da 119 a 93 minùt.
Sunt
Al pilòta 'd mòti Bud Clay (Vincent Gallo), dòp na gara in dal New Hampshire, al s mét in strada par turnàr in Califòrgna cun sèmp'r in mènt la sò èx muróśa, la Daisy (Chloë Sevigny). Lung la via al cgnós la Violet (Anna Vareschi) in na stasiòṅ 'd servìsi. Dòp avēr-ag śibî 'd śuntàr-as sèg in dal viàś, al la mòla lè dòp avēr-la dascargàda davànti a cà sua ch'la gh'iva da tōr di vistî.
Cuntinuànd par la sò strada Bud al s férma 'n àtim a cà di genitōr dla Daisy pò al tira drit in fiṅ a farmàr-'s in n'àrea 'd sòsta in autostràda. L'è a gh'è la Lilly (Cheryl Tiegs) ch'l'è dimóndi śò, lò al gh fà curàǵ, al la baśa e pò al la lasa da par lē in di sò pinsēr. Rivâ a Las Vegas, al fà 'n gir in dal quartēr dal putàni. Al in férma una, la Rose (Elizabeth Blake), al gh śibìs 'd andàr a magnàr quèl insém a 'l McDonald's, pò al gh ślunga di bèsi dascargànd-la par strada.
Rivâ finalmènt a Los Angeles, Bud al s férma a cà dla Daisy ch'la pâr bandunàda. La ragàsa la riva più tard, l'è piutòst narvóśa, e dòp avēr fumâ dal crack e avēr dascōrs sèg, la gh fà 'n buchèṅ. Bud 'l è arliâ parchè, durànt na fèsta, chi lē l'à fat sès cun soquànt óm, pardénd al putèṅ ch'al gh'iva da nàsar, ma lē la gh diś ch'i l'ànan viulentàda e lò al n à fat gnint par jutàr-la.