Tetsuo
|
C'l artìcul chè 'l è scrit in
Miranduléś |
 鉄男
| ||
| Tetsuo | ||
 La Kei Fujiwara in na figùra dal film | ||
| id. 1989 | ||
|---|---|---|
| Regìa: Shinya Tsukamoto | ||
| Scritōr: Shinya Tsukamoto | ||
| Atōr: Tomorowo Taguchi • Kei Fujiwara • Nobu Kanaoka Shinya Tsukamoto • Renji Ishibashi • Naomasa Musaka | ||
| Müsica: Chu Ishikawa | ||
| Léngua: Giapunéś | ||
| Dürä dal film: 67 minüt | ||
| Nasiōṅ: Giapòṅ | ||
Tetsuo (id.), cgnusû anc cuma Tetsuo: The Iron Man, 'l è 'n film fantàstic e ad scarésa dal 1989, girâ in biànc e négar, ad Shinya Tsukamoto ch'al 'l à anc scrit e prudót.
In dal 1992 al regìsta al 'n à fat 'n arfacimènt a culōr cun più bèsi da 'l tìtul Tetsuo II: Body Hammer che però al n gh l'à minga cavàda a rivàr a 'n sucès cumpàgn. Dal 2009 'l è 'l tèrs film dla série, Tetsuo: The Bullet Man.
La pelìcula l'è stada premiàda a 'l Fèstival dal Cìnema Fantàstic ad Róma dal 1989.
Sunt
'N óm cun di prubléma ad feticìśum (Shinya Tsukamoto) al gh'à 'l visi 'd insfilsàr-as di cumpunènt metàlic dènt'r a 'l sò còrp. Un dè al s taja na còsa par mét'r-as un tub ma la frida 'sta vòlta la fà infesiòṅ e la carna la marsìs faghénd anc di bègatèṅ. Spavintâ al taca a cùrar via par la sità ma al finìs sóta la màchina 'd 'n impiegâ, Tomoo Taniguchi (Tomorowo Taguchi), e dla sò muróśa (Kei Fujiwara), na ninéta 'd prim órdan. Pinsànd ch'al fus mòrt, i dū i al pòrtan in un bòsc e i al làsan là sénsa dir gnint a ninsòṅ e in dal méntar i fàn'n anc na ciuladìna ma c'l àt'r al véd incòsa.
La matìna dòp, méntar Tomoo al s fà la barba, al véd un cundensadurèṅ a 'l pòst 'd un pēl. Quànd al gh pasa insìma 'l raśōr a gh fà sangṿ. Da cal mumènt chè al sò còrp a taca a cambiàr e i gh spùntan da tut al bandi di pès ad fèr, tub, caṿ. A 'l pòst d'l uśèl a gh vèṅ na fréśa bèla granda ch'la prila a tut andàr tant che quànd al fà 'l amōr cun la sò dóna chi lē la mōr spricànd sangṿ dapartùt. Tomoo al la pògia in na vasca da bagn ma 'l è ciàr ch'l è tacàda la maledisiòṅ d'l óm ch'l à mis sóta ch'al riva lè anca lò mèś óm e mèś fèr vèć. A partìs na lòta sénsa quartēr e sénsa règhli fra i dū ch'a la fiṅ i s mùcian sù insém in na masa 'd fèr e 'd aśàr in dua i s védan giùst i grugn lōr.