SuXbad - Tre menti sopra il pelo

Da Wikipedia.
(Reindirizzamento da Suxbad - Tre menti sopra il pelo)

C'l artìcul chè 'l è scrit in Miranduléś Emiliàn

Superbad
SuXbad - Tre menti sopra il pelo

Hill, Cera e Mintz-Plasse in na figùra dal film
SuXcatìṿ - Tri mènt sōv'r a 'l pēl
2007
Regìa: Greg Mottola
Scritōr: Seth Rogen • Evan Goldberg
Atōr: Jonah HillMichael CeraEmma Stone
Christopher Mintz-PlasseMartha MacIsaac
Seth RogenClement BlakeJoe Lo Truglio
Aviva BaumannKevin CorriganBill Hader
Erica Vittina PhillipsJoe NunezDave Franco
Müsica: Lyle Workman
Léngua: Ingléś
Dürä dal film: 113 minüt
Nasiōṅ: Stat Unî


«
L'è l'ultma nòt prima dal diplòma e i vōlan 'n quèl sōl. E a n è mia 'n bèl vōt.»
(Tagline dal film)


SuXbad - Tre menti sopra il pelo (SuXcatìṿ - Tri mènt sōv'r a 'l pēl), cgnusû anc c'n al tìtul ad Superbad - Maiali dietro ai banchi, l'è na cumèdia vulgaròta americàna dal 2007 ad Greg Mottola. In dal tìtul itagliàṅ la paròla Superbad d'l uriginàł l'è scurtàda miténd na X a 'l pòst ad per, druànd al linguàǵ di śōvan quànd i mànd'n i mesagèṅ c'n i telefunèṅ.

Custàda vint migliòṅ ad dòlar, al film al gh'à abû pò un sucès clamuróś e al 'n à fat sù sènt-a-stanta. In dal film i s sèntan soquànti canti che però i n s càtan briśa in culòna sunóra dla pelìcula cuma Ace of Spades di Motörhead e Panama di Van Halen.

Al gh'à abû na parudìa in dal 2010 da 'l tìtul 41 anni vergine.

Sunt

Al ciciòṅ Seth (Jonah Hill) e Evan (Michael Cera) i èṅ amìg da quànd i éran pìcui, adès ch'la scōla l'è drē a finìr i gh'aṅ però da divìd'r-as parchè Evan 'l è prònt p'r andàr a Dartmouth, culéǵ ch'invéci al n à minga tòlt Seth. I dū i s lamèntan sèmpar dal fat ch'i n aṅ minga incóra gusâ e ch'i sò amìg i n i ciàman mai a 'l sò fèsti in du al ragàsi i bévan cuma dal puòsi e pò i vèr'n al gambi ch'l'è na belésa, piutòst Seth al s bèca di scaràć da lōr.

Durànt al cōrs ad cuśìna, l'insgnànta sgnōra Hayworth (Brooke Dillman) la mét Seth a far un tiramisù cun la Jules (Emma Stone) e chi lē la 'l invìda a na fèsta ch'la gh'à da far cla nòt lè. Più tard a riva lè 'n sò amìg, al sfigâ ch'al piga Edward Fogell (Christopher Mintz-Plasse), ch'al s è fat far na carta 'd identità falsa par sembràr più grand, miténd-'g insìma 'l cugnóm "McLovin" sénsa nóm. Seth al vrév che lò al la druìs par tōr di liquōr da purtàr a la fèsta, al 'l à prumìs a la Jules, p'r al fat ch'in di Stat Unî sōl qvéi c'n almànc vint-i-òṅ an i i pōlan cumpràr. Evan al gh vgnarév vluntéra anc lò insém a la Becca (Martha MacIsaac), na studènta dla sò scóla ch'la gh piàś dimóndi ma ch'la stà su 'l cas a Seth da quànd spavintàda a mòrt l'iva cunsgnâ 'n diségn fat da lò c'n un cas insìma a la mistra quànd i éran pìcui. In alóra quàl lè 'l éra 'l visi 'd Seth, disgnàr dal béghi dapartùt, una adrē a cl'atra.

Cal dòpmeśdè lè i tri ragàs i partìsan p'r andàr a cumpràr da bévar in soquànt negòsi ma a gh'è sèmpar quèl ch'a và a l'arvèrsa. Quànd finalmènt na caséra (Erica Vittina Phillips) la vénd di liquōr e dal biri a Fogell, a riva a 'l impruvìś un làdar ch'al śgranfgna via di bèsi da la casa subìt dòp avér mulâ 'n casòt a 'l ragasèṅ. I rìvan dū pulisiòt minga tant a pòst, Slater (Bill Hader) e Michaels (Seth Rogen) ch'i al pòrtan sèg par far-ag dal dmandi.

In dal parchéǵ invéci 'n óm cun di prubléma cun la giustìsia, Francis (Joe Lo Truglio), al mét sóta Seth sénsa vlēr. Par métar-'s a pòst sénsa avér di guàj chi lò al gh śibìs 'd andàr insém a na fèsta 'd un sò amìg in du i gh sarév'n un muć ad butìgli prònti da purtàr via. Rivâ a cà d'l amìg, Seth al s mét a balàr cun na ciùca ch'la taca s sfargàr-'s atàc a la sò gamba, maciànd-'g al braghi c'n al sangṿ dal sò mestruasiòṅ.

Culegamènt estéran