Stand
|
C'l artìcul chè 'l è scrit in
Miranduléś |
 Stand
| ||
 Shuteev e Koshman in na figùra dal film | ||
| A schina drita 2014 | ||
|---|---|---|
| Regìa: Jonathan Taïeb | ||
| Scritōr: Jonathan Taïeb • Anthony Robin Frederic Jean-Jacques • Constance Fischbach | ||
| Atōr: Renat Shuteev • Andrey Kurganov Andrey Koshman • Ekaterina Rusnak Veronika Merkoulova • Tanya Baranova | ||
| Müsica: Richard Wagner | ||
| Léngua: Rus • Francéś | ||
| Dürä dal film: 87 minüt | ||
| Nasiōṅ: Frància • Rùsia • Ucraìna | ||
Stand (A schina drita) 'l è 'n film dramàtic dal 2014 ad Jonathan Taïeb.
'L è stâ girâ in gnanc dū stmani a Mósca e a Charkiv in Ucraìna.
Sunt
Mént'r i èṅ drē a far un gir in màchina ad nòt p'r al stradi 'd Mósca, Anton (Renat Shuteev) e 'l sò muróś Vlad (Andrey Kurganov) i véd'n òṅ pistâ a mòrt. Anton al vrév farmàr-as ma Vlad al decìd ad tiràr drit p'r a n catàr-as di guàj. In di dè a vgnir a s vèṅ a savēr ch'al ragàs dasfurtunâ, mòrt a 'l uśdàl dòp ès'r andâ in còma, al s ciamàva Nikolaj, 'l éra 'n tifóś sfegatâ dla squàdra dl'“Armàda rósa”, al CSKA, e ch'l éra anc un fnòć e 'l è par quàl lè ch'l è stâ cupâ. In gir a gh'è dla gint ch'la s divertìs a dar adòs a i buśòṅ, tant a la pulisìa a n gh in ciàva gnint.
Anton, ch'al fà 'l infarmēr par dal vèci babuški cuma l’Ol'ga (Veronika Merkoulova), al decìd 'd andàr-'g a fónd lò, al fà finta 'd ès'r un giurnalìsta indipendènt e insém a Vlad al và a dmandàr dal nutìsi a la màd'r ad Nikolaj (Nataliia Baranova). Chi lē la n vōl briśa dascórar sèg, tant sò fiōl a n gh al dà indrē ninsòṅ, invéci sò surèla Tanja (Tanya Baranova) la diś che sò fradèl, la nòt ch'l è stâ masâ, 'l iva cgnusû òṅ ciacrànd in internet e 'l éra finî in na trapla. Anton al và avànti incóra e al s fà dar na maṅ par la Katjuša (Ekaterina Rusnak), na ragàsa ch'la stùdia a Parì, méntar Vlad al s tira indrē parchè al gh'à paùra ch'a pòsa sucédar quèl a 'l sò muróś.
Durànt i sò gir Anton al cgnós Andrej (Andrey Koshman) e al dvènta sò amìg méntar la Katja la tórn' in Frància e Vlad al và par sò cònt, stuf dla piga ch'l'à tòlt cla situasiòṅ lè. Un dè Anton al và in dal bòsc insém a Andrej par scultàr gl'uśèi cantàr e par sintìr s'a gh'è di lóv ch'i bàjan da luntàṅ. Al n pénsa gnanc luntanamènt che qvàl lè 'l è 'n pòst parfèt par tiràr-ag na trapla parchè a n gh'è anma viva.