Shrooms - Trip senza ritorno
|
C'l artìcul chè 'l è scrit in
Miranduléś |
 Shrooms
| ||
| Shrooms - Trip senza ritorno | ||
 L'Alice Greczyn in na figùra dal film | ||
| Shrooms - Viàś sénsa ritóran 2007 | ||
|---|---|---|
| Regìa: Paddy Breathnach | ||
| Scritōr: Pearse Elliott | ||
| Atōr: Lindsey Haun • Max Kasch • Jack Huston Robert Hoffman • Maya Hazen • Sean McGinley | ||
| Müsica: Dario Marianelli | ||
| Léngua: Ingléś | ||
| Dürä dal film: 80 minüt | ||
| Nasiōṅ: Irlànda • Régn Unî • Danimàrca | ||
Shrooms - Trip senza ritorno (Shrooms - Viàś sénsa ritóran) 'l è 'n film ad scarésa dal 2007 ad Paddy Breathnach.
Sunt
La Tara (Lindsey Haun), studènta americàna dn'università catòlica, la decìd ad far un viàś in Irlànda p'r andàr a catàr un ragàs ch'a gh piàś dimóndi, Jake (Jack Huston), ma anc p'r andàr in di bòsc dal pòst a casa 'd funś ad qvéi ch'i rimbambìsan quànd ta t mét in bóca la sò capèla parchè i t fàn'n andàr fóra 'd tèsta. I vànan sèg di àtar sò amìg śbucâ e malnét, al tacabrìghi musculóś Bluto (Robert Hoffman), Troy (Max Kasch), la sò muróśa Holly (Alice Greczyn), una cun dū laśéni impinìdi 'd pēi, e la Lisa (Maya Hazen) ch'la gh'à 'l téti arfàti.
La Tara la in cata òṅ c'n un bulèṅ nég'r in sla capèla ch'a vōl dir ch'l è òṅ ad qvéi ch'i pōlan cupàr s't al magn ma lē la n gh fà minga a mènt e la 'l manda śò listés. A gh vèṅ na tarmarìa 'd c'l àtar mónd e dal cunvulsiòṅ ma par furtùna la la scampa e in na quàlc manéra la taca a far di insùni in du la véd di quèi sucès da di atri bandi. Anc Bluto al decìd ad far-'s un „viàś“ bvénd un the cunsâ c'n i funś ch'i far vgnir gl'alucinasiòṅ. Al taca acsè a dascórar cun na vaca cun la vóś da masć ch'la gh diś ch'l è bèla futû e difàti al mōr p'r òpra 'd un persunàg cun na tònaca adòs cgnusû cuma Fradèl Négar (Toby Sedgwick) ch'l éra drē a far-'g un buchèṅ in màchina o fórsi 'l éra qvél ch'al cardìva lò parchè al pinsàva che lè dènt'r a gh fus na bèla śuvnòta nûda. Al dè dòp al grup, a n vdénd-al piò, 'l al và a pascàr dapartùt e i al càtan mòrt méntar l’Holly la tira drit da par lē e la finìs in dna baràca 'd dū buscajōi, Ernie (Don Wycherley), òṅ ch'al pèrd sèmpar la salìa da la bóca quànd al dascór, e Bernie (Sean McGinley), sò fradèl più vèć. A s véd subìt ch'i èṅ dimóndi periculóś e ciucâ in dla tèsta da quànd sò màdar da pìcui la i saràva dènt'r a 'n ciûś c'n i ninét che pò Bernie al s gusàva.