Sean Paul

C'l artìcul chè 'l è scrit in Miranduléś

«

Girl get busy, just shake that booty non-stop, when the beat drops just keep swinging it, get jiggy, get crunked up, percolate anything you want to call it, oscillate you hip and don’t take pity, me want fi see you get live upon the riddim when me ride.»

(EN)(Get Busy, 2002)

«

Dóna dà't da far, squàsa cal cûl lè sénsa farmàr-at, quànd i bàtit i crésan cuntìnua a far-al śdundlàr, scaprìśia't pur cuma s'a n gh fus minga 'n admàṅ, filtra tut qvél ch'at vō ciamàr, squàsa i galòṅ sénsa pità, mè a vój véd'r-at méntar 't al ciàp da 'l viṿ quànd a cavalchém.»

(MUD)

Sean Paul durànt gl'International Reggae & World Music Awards dal 2007

Sean Paul Ryan Francis Henriques, cgnusû méj cuma Sean Paul (Kingston, 9 ad Śnar dal 1973, a s lèś [ʃɔːn pɔl] in ingléś) 'l è 'n cantànt e rapper giamaicàṅ, dal vòlti anc prudutōr e atōr.

Al s è fat cgnós'r in dal 2003 quànd 'l à fat vgnir fóra 'l sìngul Get Busy ch'al gh l'à cavàda a rivàr a 'l prim pòst in clasìfica in Itàglia e in dla Billboard di Stat Unî.

Biugrafìa

Nâ da pàdar purtughéś e da màdar giamaicàna, Sean al taca a studiàr mùśica da śōvan e 'l cata i sò prim sucès in dal 1996 cun la canta Baby Girl ma p'r al sò debùt in di Stat Unî a gh'è da spetàr al 1998 anc se Infiltrate al n fà minga un stus da sfundàr. Al gh la cava invéci dū an dòp cun 'l àlbum Stage One cunsiderâ al quàrt disc raggae d'l an. In dal disc a gh'è 'l pès Hot Gal Today fat insém a Mr Vegas.

Dòp èsar pasâ a l'Atlantic Records in dal 2002 al fà vgnir fóra Dutty Rock, un disc ch'al cata 'l sucès dapartùt in dal mónd, specialmènt par via dal sìngul Get Busy ma anc Like Glue, I'm still in love with you e Gimme the Light. In cal perìud lè al culàbura anc cun di àt'r atìsta fémni cuma la Beyoncé (Baby Boy), la Rihanna (Break it off) e la Blu Cantrell (Breathe).

In dal 2005 'l è la vòlta ad The Trinity ch'al vénd bèṅ e ch'al gh'à dènt'r i sìngui We Be Burnin’, Ever Blazin’ e Temperature. Al quàrt àlbum al s ciàma Imperial Blaze e 'l è dal 2009, i vgnaràṅ pò fóra Tomahawk Technique (2012) e Full Frequency (2013).

Discugrafìa

Àlbum

2000 - Stage One
2002 - Dutty Rock
2005 - The Trinity
2009 - Imperial Blaze
2012 - Tomahawk Technique
2013 - Full Frequency

Racòlti

2007 - Reggae Gold 2007

Mix

2009 - The Odyssey Mixtape

Culegamènt estéran