Saw - L'enigmista

Da Wikipedia.

C'l artìcul chè 'l è scrit in Miranduléś Emiliàn

Saw
Saw - L'enigmista

Cary Elwes in na figùra dal film
Śghét - 'L enigmìsta
2004
Regìa: James Wan
Scritōr: James Wan • Leigh Whannell
Atōr: Cary ElwesLeigh WhannellTobin Bell
Danny GloverMike ButtersBenito Martinez
Makenzie VegaKen LeungMichael Emerson
Paul GutrechtShawnee SmithDina Meyer
Müsica: Charlie Clouser • Danny Lohner
Léngua: Ingléś
Dürä dal film: 100 minüt
Nasiōṅ: Stat UnîAustràglia


«
Vìv'r o murìr: sarnìs da par tè.»
(Tagline dal film)


Saw - L'enigmista (Śghét - 'L enigmìsta) 'l è 'n film ad scarésa dal 2004 ad James Wan ch'al 'l à anc scrit insém a Leigh Whannell. 'L è stâ girâ in sōi daśdòt dè c'n un budget 'd un migliòṅ e dū ad dòlar e 'l è stâ preśentâ a 'l Sundance Film Festival.

'L à fat sù un muć ad bèsi, da piò ad sènt migliòṅ ad dòlar, e 'l à dâ vita a siē séguit: Saw II - La soluzione dell'enigma (2005), Saw III - L'enigma senza fine (2006), Saw IV (2007), Saw V (2008), Saw VI (2009) e Saw 3D - Il capitolo finale (2010). 'L à fat cgnós'r al persunàǵ ad Jigsaw (Śghét) e 'l putòć ad Billy al Pupàs ch'al gira in tricìcclo.

Sunt

Al futógrafar Adam Faulkner (Leigh Whannell) al s déśda in na vasca da bagn 'd un lìcit pùblic da schiva ligâ a 'n tub cun na cadéna. Da cl'atra banda a gh'è 'l dutōr specialiśâ in càncar Lawrence Gordon (Cary Elwes), anc lò parśunēr, mént'r in dal mèś, in un lâg ad sangṿ, a gh'è 'l cadàvar 'd un tisi ch'al s è tirâ un cōlp in cô. In dla sò maṅ al tîṅ stric un walkman.

I dū óm i vèran dal busti ch'i gh'aṅ lè darènt par tiràr fóra dū caséti, pò Adam al mét sù la sua par scultàr al mesàǵ ch'a gh'è registrâ insìma. Na vóś baritunàla la diś a Gordon ch'al gh'à da cupàr Adam prima 'd siē óri dla basōra o sinò lò 'l masarà sò mujér, l’Alison (Monica Potter), e sò fiōla, la Diana (Makenzie Vega). Inólt'r al sàdig al śònta che qvél in dal mèś al s è cupâ da par lò p'r a n patìr piò parchè al gh'iva dal vlèṅ in dal sò véni. I parśunēr i càtan pò dū śghét ch'i dróan par tajàr al cadéni ma Adam al sćiànca 'l suo. Par libràr-'s i gh'aṅ da sarnìr ad tajàr-as via un pē, 'l è par cal mutìṿ chè che lò al gh i à fat catàr. A cal punt lè Gordon al taca a pinsàr ad savēr chi è stâ a srar-i lè dèntar, 'l infarmér John Kramer (Tobin Bell).

C'l óm lè, cgnusû anc c'n al scutmàj ad Jigsaw, 'l iva bèla invintâ dal trapli p'r atar dū sugèt. Al prim 'l éra 'n ciciòṅ burghéś ciamâ Paul Lealy Stallberg (Mike Butters) ch'l iva pruâ soquànti vòlti a tajàr-'s al véni ma sōl p'r avér tut i òć adòs. Jigsaw al 'l iva sarâ in mudàndi in na gàbia 'd fił spinâ dand-ag pôc tèmp par saltàr fóra ma lò 'l éra mòrt par na muragìa. C'l àtar, Mark Wilson Rodriguez (Paul Gutrecht), 'l éra òṅ ch'al gh catàva gust a dar fōg in gir, adès 'l è stâ velenâ e al gh'à da vèr'r in présia na casafòrt cun 'l antìdut prima ch'al vlèṅ al faga efèt ma al gh'à anc tut al còrp nûd pîṅ ad gèl ch'al pōl ciapàr fōg e lò al gh'à da druàr na candéla par far luś. I pulisiòt David Tapp (Danny Glover) e Steven Sing (Ken Leung) i al càtan mòrt bruśâ.

Culegamènt estéran