Rihanna

C'l artìcul chè 'l è scrit in Miranduléś

«

Rihanna where you at? You have my heart and we'll never be worlds apart, may be in magazines but you'll still be my star, baby cause in the dark you can't see shiny cars and that's when you need me there with you, I'll always share because when there's sunshine, we'll shine together, told you I'll be here forever, said I'll always be a friend, took an oath I'm a stick it out till the end, now that it's raining more than ever, know that we'll still have each other, you can stand under my umbrella.»

(EN)(Umbrella, 2007)

«

Rihanna in du sē't? At gh'à al mè cōr e nuàtar a n s dividrém mai, a prò èsar in si giurnài ma tè 't sē la mè stéla, teśôr parchè in dal buj ta n pò minga védar dal màchini luśénti e l'è in cal mumènt lè ch'at gh'à biśógn ch'a sia lè tèg, a 'l vivrò insém a tè parchè quànd a gh'è la luś dal sōl a brilarém insém, a t ò dit ch'a starò chè par sèmpar, a t ò dit ch'a t sarò sèmp'r amìg, a-j-ò fat un giuramènt, a 'l mantgnarò in fin a la fîṅ, adès ch'l è drē a piōvar cuma a n s è mai vdû, a sò ch'a cuntinuarém a ciapàr-as, at pó restàr sóta la mè umbrèla.»

(MUD)

La Rihanna (a s lèś /riˈɑːnə/ anc s'al sò nóm p'r estéś al sarév Robyn Rihanna Fenty) (Saint Michael, 20 ad Favràr dal 1988) l'è na cantànta dal Barbados, prima artìsta dal sò paéś a vìnsar un Grammy Award.

Biugrafìa

Rihanna la s trasferìs in di Stat Unî da baghéta a séd'ś an cun un cuntràt discugràfic in maṅ e Evan Rogers ch'al gh tgniva a drē. La fà al sò debùt in dal 2005 cun 'l àlbum Music of the Sun (Mùśica dal Sōl) e al sìngul ad sucès Pon de Replay.

Dòp pôc méś l'è la vòlta ad A Girl Like Me (Na baghéta cuma mè) e i sìngui S.O.S. (più 'd un migliòṅ ad còpi vindùdi ad cla cansòṅ lè ch'la gh'à dèntar na campiunàda dal braṅ Tainted Love di Soft Cell) e Unfaithful. Par la prima vòlta Rihanna la gh la cava a finìr in di prim sènt pòst in dla clasìfica americàna.

In dal 2007 la fà gnir fóra, in tri versiòṅ difarénti, al disc dla sò cunsacrasiòṅ, Good Girl Gone Bad (La brava baghéta l'è dvintàda catìva) e soquànt sìngui famóś cuma Umbrella (cun Jay-Z) e Don't Stop the Music.

Dòp 'n àlbum cun di sòṅ tìpic dal R&B, Rated R gnû fóra in dal 2009 insém a i sìngui Russian Roulette e Rude Boy, in dal 2010 la fà catàr in di negòsi Loud, un lavōr ch'al vénd da piò ad sinc migliòṅ ad còpi, cun i sìngui Only Girl (In The World) e S&M a spìnś'r al in élt.

In dal 2011 'l è al tùran dal sèst disc Talk That Talk ch'al misćia i stìi di sò disc precedènt cun di sòṅ nóṿ e al gh'à in dal pès We Found Love (A-j-ém catâ 'l amōr) al sò braṅ ad punta.

Dal sò eśòrdi a gnir a 'dès, la Rihanna l'à vindû da piò ad vint migliòṅ 'd àlbum e ssanta migliòṅ ad sìngui, sèmpar par l'etichéta Def Jam.

In dal 2011 la taca anc a far la stilìsta (par Giorgio Armani) e l'atóra, in dal film Battleship.

Vita privàda

Dòp na relasiòṅ cun 'l atōr Josh Hartnett, Rihanna la dvénta la muróśa dal cantànt Chris Brown e la rèsta sèg in fiṅ a 'l 8 ad Favràr dal 2009 quànd la fà savér che lì lò al l'iva fata négra, cun na facia pîna ad nis, mulànd-ag di scupasòṅ, di marùc, di sćiafòṅ e di cruc. Da 'l 2010 la s è misa insém a 'l śugadōr ad baseball Matt Kemp.

Discugrafìa

Àlbum

2005 - Music of the Sun
2006 - A Girl like Me
2007 - Good Girl Gone Bad
2009 - Rated R
2010 - Loud
2011 - Talk That Talk

Mix

2009 - Good Girl Gone Bad: The Remixes
2010 - Rated R: Remixed

Sìngui

«Pon de Replay»
«If It's Lovin' That You Want»
«S.O.S»
«Unfaithful»
«We Ride»
«Break It Off» (cun Sean Paul)
«Umbrella» (cun Jay-Z)
«Shut Up and Drive»
«Don't Stop the Music»
«Hate That I Love You» (cun Ne-Yo)
«Take A Bow»
«Disturbia»
«Rehab»
«Russian Roulette»
«Hard» (cun Jeezy)
«Rude Boy»
«Rockstar 101» (cun Slash)
«Te Amo»
«Only Girl (In the World)»
«What's My Name?» (cun Drake)
«S&M»
«California King Bed»
«Man Down»
«Cheers (Drink to That)»
«We Found Love» (cun Calvin Harris)
«You Da One»
«Talk That Talk» (cun Jay-Z)
«Where Have You Been»

Culegamènt estéran