Prospettive di un delitto
|
C'l artìcul chè 'l è scrit in
Miranduléś |
 Vantage Point | ||
| Prospettive di un delitto | ||
 Edgar Ramírez in na figùra dal film | ||
| Pruspetìvi 'd un delìt 2008 | ||
|---|---|---|
| Regìa: Pete Travis | ||
| Scritōr: Barry L. Levy | ||
| Atōr: Dennis Quaid • Matthew Fox • Edgar Ramírez Forest Whitaker • Saïd Taghmaoui • Ayelet Zurer Sigourney Weaver • William Hurt • Eduardo Noriega Bruce McGill • Zoe Saldana • Leonardo Nam | ||
| Müsica: Atli Örvarsson | ||
| Léngua: Ingléś • Spagnōl | ||
| Dürä dal film: 90 minüt | ||
| Nasiōṅ: Stat Unî | ||
Prospettive di un delitto (Pruspetìvi 'd un delìt) 'l è 'n thriller americàṅ dal 2008 ad Pete Travis ch'al cònta dal tintatìṿ ad rapimènt dal “Potus” (President Of The United States) da part 'd un grup terurìstic, tgnénd adrē a òt punt ad vista difarènt par mét'r insém la véra.
Custâ quarànta migliòṅ ad dòlar, al film al 'n à pò fat sù da piò 'd sènt-sinquànta.
Sunt
[mudéfica la surzéia]A Salamànca (Spaggna) 'l è in cōrs un summit internasiunàł su la guèra a 'l terurìśum. Fra i cap ad stat ch'i gh'aṅ da dascórar su 'l palc a gh'è anc al presidènt di Stat Unî Ashton (William Hurt) prutèt par gl'agìnt segrét e dla sicurésa Thomas Barnes (Dennis Quaid), Kent Taylor (Matthew Fox) e Holden (Richard T. Jones).
Mént'r a dascór al sìndig De Soto (José Carlos Rodríguez) e 'n turìsta americàṅ, Howard Lewis (Forest Whitaker), al tira śò incòsa cun la video-caméra, qualchidòṅ a spara a 'l Potus, pò na dóna ciamàda Veronica (Ayelet Zurer) la tira na bómba par far saltàr p'r ària incòsa ma 'l è sōl un diversìṿ parchè a n s trata minga dabòṅ dal presidènt americàṅ ma dna sò cóntar-figùra e i terurìsta i saìv'n incòsa. I servìsi segrét i ìvan difàti naśâ quèl e i 'l ìvan lugâ in un palàs par prutéś'r-al.
Holden al cur adrē a 'n suspetâ, un pulisiòt spagnōl ciamâ Enrique (Eduardo Noriega), pròpria quànd 'l agìnt Javier (Edgar Ramírez), sóta ricàt di terurìsta ch'i gh'ìv'n in maṅ sò fradèl, al rapìs Ashton par cunsgnàr-'l a la Veronica, falsa infarméra dla Cróś Rósa.
P'r andàr-'g a fónd Thomas al s fà dar i servìsi filmâ d'l atintâ da la Rex Brooks (Sigourney Weaver) dal canàl televiśìṿ Global News Network ch'al traśmitìva 'l avenimènt da 'l viṿ.