Popeye
|
C'l artìcul chè 'l è scrit in
Miranduléś |
Popeye (cgnusû in Giapòṅ cun al nóm ad Popai, ポパイ) 'l è 'n śōg vìddeo dal 1982 dla Nintendo ch'al fà riferimènt a i persunàǵ dal fumét ad Bras ad Fèr. In dal funsiunamènt al s davśìna dimóndi a di àtar śōg vìddeo cuma Donkey Kong e Mario Bros.
Règhli
Al śugadōr al gh'à purtàr in gir, a 'l intéran 'd un parcōrs stablî, al persunàǵ ad Bras ad Fèr par catàr sù di quèi butâ śò piàn piàṅ par la sò murōśa Ulìvia prima ch'i finìs'n in mâr. Chi lē la s cata sémp'r in sima e, s'i sò bagàj i vénan ciapâ più in élt ch'a s pōl, i faṅ muciàr sù più punt. In dal parcōrs a gh tîṅ a drē Bluto ch'l al vōl ciapàr par dar-ag na lesiòṅ e far-ag pèrdar na vita. C'l umòṅ lè 'l è anc bòṅ ad far di salt a 'l élta par tucàr-al o anc 'd arbasàr-as śò cun un bras par śgranfgnàr-al s'al pasa ad sóta. Quànd pò al s gh cata in frònt al pōl butàr-'g adòs dal butìgli. Dal vòlti a salta fóra in un cantòṅ, prima ad sparìr subìt, anc la Stria dal Mâr ch'la dróa al butìgli anca lē o, dòp la prima rutasiòṅ, di tésć ch'i strabàlśan par tèra.
Bras ad Fèr al n è briśa bòṅ ad saltàr. Par difénd'r-as al pōl sōl druàr al scalaróli o butàr-as śò in dal piàṅ ad sóta. Al pōl anc tiràr di pugn, ch'i n còntan gnint còntar Bluto ma ch'i sarvìsan par śbragàr in vōl i śavàj ch'i gh tìran còntar. In tut i livèi a gh'è anc un baràtul ad spinàs: s'i vènan magnâ, p'r un pôc ad tèmp, a s pōl anc tiràr dal śéśuli a Bluto butànd-'l in mâr par 'n àtim, ma pò lò al tórna sù listés.
I livèi ad śōg i èṅ tri ch'i s ripétan a rutasiòṅ:
- In na sòrta ad scantinâ l'Ulìvia la lasa cascàr śò di cōr. Bras ad Fèr al gh'à da catàr-an sù vint-quàtar e al pōl tiràr un pugn a 'n sac da boxe par far cascàr śò un séć adòs a Bluto: s'l al ciàpa, chi lò 'l è custrét a pèrdar dal tèmp par libràr-as.
- Ad fóra da 'n palàs ad nòt l'Ulìvia la sòna na lira e la lasa crudàr śò dal nòti muśicàli e al sò murōś al gh'à da far-an sù sédas. I cumparìsan anc Arvijèṅ e Pōld ma i n fànan gnint. Al budlòṅ al sarvìs però cuma 'n péś in sna léva dna plinga par far in manéra che Bras ad Fèr al pòsa vulàr in élt butànd-as insìma.
- In sun barcòṅ i persunàǵ i gìr'n insìma a di pònt. L'Ulìvia, imparśunàda par 'n avultòj, la lasa andàr al quàtar létri dla paròla HELP (Ajùt). 'L avultòj al cur a drē a Popeye ma chi lò al gh pōl tiràr un marùc par difénd'r-as.