Patto di sangue (film 2009)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Sorority Row
Patto di sangue
Patto di sangue (film 2009).png
La Evigan e la Jamie Chung in na figùra dal film
Pat ad sangṿ
2009
Regìa: Stewart Hendler
Scritōr: Mark Rosman
Josh Stolberg • Pete Goldfinger
Atōr: Briana EviganLeah PipesRumer Willis
Jamie ChungMargo HarshmanCarrie Fisher
Audrina PatridgeJulian MorrisMatt O'Leary
Müsica: Lucian Piane
Léngua: Ingléś
Dürä dal film: 96 minüt
Nasiōṅ: Stat Unî


«
Surèli in dla vita... e in dla mòrt.»
(Tagline dal film)


Patto di sangue (Pat ad sangṿ) 'l è 'n film ad scarésa americàṅ dal 2009 ad Stewart Hendler, arfacimènt dna pelìcula dal 1983, Non entrate in quel collegio.

'L è custâ dódas migliòṅ e mèś ad dòlar ma al 'n à fat sù più dal dópi, vint-sèt.

Sunt

La “Theta Pi” l'è n'asuciasiòṅ ad studènti fémni dn'università americàna, la Rosman University. I gh fànan part la Megan (Audrina Patridge), la Cassidy (Briana Evigan), la Jessica (Leah Pipes), l’Ellie (Rumer Willis), la Claire (Jamie Chung) e cla rója dla Charlene dita Chugs (Margo Harshman), surèla dal muróś dla Megan, Garrett (Matt O'Leary). Che lōr, ch'i s ciàman “surèli” l'una cun cl'atra, i urganìśan da spés dal fèsti c'n i sò amìg in dua a s bév e a s ciùla ch'l è 'n piàśēr anc se la sgnurìna Crenshaw (Carrie Fisher), a cap dl'urganiśasiòṅ, la n è minga tant 'd acòrd.

Na sira, pròpria durànt òṅ ad chi party chè in vila, al “Theta Pi” i vōlan tiràr un brut schèrs a Garrett par na questiòṅ ad còran fat a la sò muróśa anc s'a tacàr l'éra stada lē. I gh dànan dal pìluli ch'i sarvìsan par rimbambìr cal dóni par pò stupràr-li in manéra da psēr purtàr-'s a lèt facilmènt la Megan ma invéci al madśìni ch'al gh'à dâ, cun la Megan ch'la saìva incòsa, i éran sōl dal vitamìni. Mént'r al ragàs al la baśa, lē la fà finta 'd èsar mèśa indurminsàda e pò la śbavśa fóra quèl faghénd-ag crédar 'd ès'r in punt ad mòrt par far-ag ciapàr un spaj. Chi atri sò amìghi i gh dìśan che la Megan l'è mòrta dònca a gh'è da lugàr in présia 'l còrp parchè i gh'èṅ dèntar tut. Dòp avér-la purtàda in campàgna davśèṅ a 'n lâg, al “Theta Pi” i vōlan tgnir-la lunga e i dascóran ch'a n s pōl minga butàr al cadàv'r in dl'àqua parchè cun d'l usìgen in di palmòṅ, al còrp 'l armagnrév a gala. Garrett, a n saénd minga ch'l è tut un schèrs, al tōś na ciàṿ a cróś da la màchina e al gh śbuśìs i palmòṅ masànd-la. Adès ch'in dla mèrda tut i ragàs i gh'èṅ dabòṅ, al grup al decìd ad butàr al còrp dla Megan śò da 'n pós e 'd a n cuntàr gnint a ninsòṅ anc se la Cassidy la n è minga 'd acòrd ma l'è custréta a taśēr listés parchè la Megan la gh'iva adòs al sò majòṅ pîṅ ad spric ad sangṿ.

Soquànt méś dòp, al dè dla làurea, a s fà n'atra fèsta anc se la Cassidy, ch'in cal méntar la s éra dastacàda 'n pôc da chi atri surèli e la s è misa cun Andy (Julian Morris), la n gh'à minga tanta vója 'd rìdar. A riva lè la surèla più pìcula dla vitma, la Maggie (Caroline D'Amore), ch'la gh sumìlia dimóndi, pò in di telefunèṅ dal ragàsi a salta fóra na foto dna ciàṿ a cróś cumpàgna a qvéla druàda par cupàr la Megan. Qualchidòṅ a sà incòsa e qvél qualchidòṅ al s mét anc a far-li fóra una dòp cl'atra, tacànd pròpria da cla malnéta dla Chugs.

Culegamènt estéran