Passioni e desideri
|
C'l artìcul chè 'l è scrit in
Miranduléś |
 360
| ||
| Passioni e desideri | ||
 Moritz Bleibtreu e Jude Law in na figùra dal film | ||
| Pasiòṅ e deśidèri 2011 | ||
|---|---|---|
| Regìa: Fernando Meirelles | ||
| Scritōr: Peter Morgan | ||
| Atōr: Jude Law • Anthony Hopkins • Ben Foster Moritz Bleibtreu • Lucia Siposová • Rachel Weisz Juliano Cazarré • Maria Flor • Jamel Debbouze | ||
| Müsica: Robert Burger | ||
| Léngua: Ingléś • Tedésc • Àrab Francéś • Purtughéś • Rus • Śluvàc | ||
| Dürä dal film: 110 minüt | ||
| Nasiōṅ: Stat Unî • Àustria Régn Unî • Frància • Braśìl | ||
Passioni e desideri (Pasiòṅ e deśidèri) 'l è 'n film dramàtic dal 2011 ad Fernando Meirelles ispirâ a l'òpra teatràla “Riri” 'd Arthur Schnitzler.
La pelìcula, preśentàda a 'l Fèstival Internasiunàl dal Film ad Turònt, l'à fat sù un migliòṅ e sèt ad dòlar.
Sunt
La Mirka (Lucia Siposová), cumpagnàda a Viéna par sò surèla Anna (Gabriela Marcinková), la decìd ad tacàr a lauràr par l'agensìa 'd escort ad Rocco (Johannes Krisch) ch'al la manda subìt in d'l albêrg in du a s cata 'l sò prim cliènt, Michael Daly (Jude Law), 'n ingléś ch'l è in Àustria par saràr 'n afâr c'n un vendidōr ad màchini (Moritz Bleibtreu). Chi lò, quànd al capìs ch'la putàna ch'la s cata in dla hall l'è lè par lò, al taca però a ricatàr-al.
La Rose, da 'l cant suo, la vōl dar un taj a la relasiòṅ ch'la gh'à c'n al futógrafar braśigliàṅ Rui (Juliano Cazarré) ch'a sò vòlta 'l iva mis i còr'n a la sò muróśa, la Laura (Maria Flor), ch'la decìd ad lasàr-al par turnàr a Rio de Janeiro quànd 'l al bèca. Su 'l aparéć la ragàsa la fà dū paròli cun John (Anthony Hopkins), un vèć ch'l à pardû sò fiōla scapàda 'd cà e ch'adès la n s cata piò, pò la decìd ad purtàr-'s in cambra un ragàs cgnusû in aeropòrt, Tyler (Ben Foster), sénsa savēr che chi lò 'l è péna vgnû fóra da parśòṅ in du 'l à pasâ siē an esénd un viulentadōr. 'L óm al gh la cava a reśìstar a la tentasiòṅ e al n fà gnint anc se la Laura, mèśa ciùca, la gh admànda cun tut al cōr ad dar-ag dū cōlp.
A Phoenix na rusa ciamàda Valentina (Dinara Drukarova), ch'la và a dascórar di sò prubléma da i puòs anònim in du a gh'è anc John, la decìd ad dmandàr al divòrsi a sò marè Sergei (Vladimir Vdovichenkov) esénd inamuràda 'd 'n àt'r óm, al dentìsta in du la lavóra (Jamel Debbouze) che però al n pōl minga impgnàr-as sèg parchè 'l è musulmàṅ e 'l imàm (Djemel Barek) al gh'à dit ch'andàr a lèt cun dal dóni spuśàdi a n s pōl pròpria minga. Sergei però al n gh'à minga tèmp par disquiśìr parchè al gh'à da scarusàr al sò cap (Mark Ivanir) in 'n hutèl in du al gh'à apuntamènt cun n’escort, la Mirka. Rocco, saénd ch'l è pîṅ 'd bèsi, al vōl fargàr-'g-i tut, druànd la scaja cuma trapla. A Sergei, sémpar tgnû schis da lò, a n gh in ciàva gnint dla fiṅ ch'al farà parchè 'l à péna cgnusû na ragasōla dimóndi gustóśa lè fóra, l’Anna.