Parigi
|
C'l artìcul chè 'l è scrit in
Miranduléś |
 Paris
| ||
| Parigi | ||
 La Binoche e Romain Duris in na figùra dal film | ||
| Parì 2008 | ||
|---|---|---|
| Regìa: Cédric Klapisch | ||
| Scritōr: Cédric Klapisch | ||
| Atōr: Juliette Binoche • Romain Duris • Karin Viard Fabrice Luchini • Albert Dupontel • François Cluzet | ||
| Müsica: Robert Burke • Loïc Dury • Christophe Minck | ||
| Léngua: Francéś | ||
| Dürä dal film: 130 minüt | ||
| Nasiōṅ: Frància | ||
Parigi (Parì) 'l è 'n film dramàtic francéś dal 2008 ad Cédric Klapisch.
Sunt
Pierre (Romain Duris) al viṿ da par lò a Parì in dua 'l fà 'l balarèṅ. Purtròp un dè i mèdag i gh càt'n un brut mâł a 'l cōr ch'a gh lasa pôc da scampàr, a gh'è sōl da sprar in un trapiànt ma pò a n è gnanc dita. Quànd sò surèla Élise (Juliette Binoche), asisènta suciàla ad quarànt' an cun tri fiōi pìcui da tiràr sù sénsa marè parchè mulàda par dū vòlti, la 'l vèṅ a savēr la và a star sèg in dal sò apartamènt in dua lò al tîṅ 'd òć la gint ch'la pasa.
A gh'è la furnàra (Karin Viard) in dua lò 'l tōś al paṅ ch'l'è drē a pascàr na cumésa ma la n è mai cuntènta parchè la n cata minga dal nurmàni o dgl'alsasiàni ch'i lavóran dimóndi minga cuma 'l brétuni ch'i gh'aṅ la tèsta dura o 'l córsi ch'a n s in dascór gnanc. Adès la gh'à in próa na magrebìna, la Khadija (Sabrina Ouazani), ch'la gh'à 'n caràtar ch'a t 'l arcmànd ma almànc la gh dà dèntar dimóndi. Pò a gh'è di óm ch'i gh'aṅ di banc dal pés e dla fruta a 'l marcâ, cuma Jean (Albert Dupontel), Mourad (Zinedine Soualem) e Franky (Gilles Lellouche), ch'i pènsan sōl a cal dóni, o 'n prufesōr ad stòria, Roland Verneuil (Fabrice Luchini), ch'al gh'à 'n fradèl architét, Philippe (François Cluzet), e ch'l à pardû la tèsta par na sò studènta bèla figa, la Laetitia (Mélanie Laurent). Par ciapàr quèl al s è anc arùt a giràr di ducumentàri par la televiśiòṅ.
Jean al gh'armàgn dimóndi mâł quànd la sò èx muróśa e culéga, la Caroline (Julie Ferrier), la mōr in 'n incidènt in muturèṅ ma 'l è 'l ucaśiòṅ par lò ad catàr 'l afèt dl’Élise ch'la và sèmp'r a cumpràr la fruta da lò. Mént'r a nas al putèṅ ad Philippe, qvéi d'l uśdàł i ciàman Pierre parchè a gh'è 'd andàr dènt'r in présia.