Orphan
|
C'l artìcul chè 'l è scrit in
Miranduléś |
 Orphan
| ||
 L'Isabelle Fuhrman in na figùra dal film | ||
| Òrfan 2009 | ||
|---|---|---|
| Regìa: Jaume Collet-Serra | ||
| Scritōr: Alex Mace • David Leslie Johnson | ||
| Atōr: Vera Farmiga • Isabelle Fuhrman • Lorry Ayers Jimmy Bennett • Peter Sarsgaard • CCH Pounder Karel Roden • Aryana Engineer • Margo Martindale | ||
| Müsica: John Ottman | ||
| Léngua: Ingléś • Èstun | ||
| Dürä dal film: 123 minüt | ||
| Nasiōṅ: Stat Unî • Cànada Germàgna • Frància | ||
Orphan (Òrfan) 'l è 'n film ad scarésa dal 2009 ad Jaume Collet-Serra. Al film, prudót par Leonardo Di Caprio, 'l è vgnû fóra in di Stat Unî al 24 ad Luj dal 2009, mént'r in Itâglia 'l è stâ distribuî a far data da 'l 16 'd Utóbar dal 2009.
Sunt
La famìja Coleman, John (Peter Sarsgaard) e la Kate (Vera Farmiga), la gh'à dènt'r un vōd ch'al n s pōl minga impinìr parchè, anc s'i gh'àṅ dū fiōi e i staṅ bèṅ a livèl ad bèsi, 'n abòrt al gh'à lasâ na frida ch'la i fà patìr dimóndi. L'ùnica sulusiòṅ ch'i gh'ànan la par èsar qvéla ad tōr in adusiòṅ la pìcula Esther (Isabelle Fuhrman), na putìna dōlsa e inteligìnta ad dód'ś an ch'la i à culpî durànt un gir in 'n urfanutròfi. Na vòlta sèg però i sucédan di brut quèi e di incidènt spavintóś e tuti 'l vòlti a gh'è sèmpar l’Esther in mèś. I genitōr i tàc'n a preucupàr-'s e acsè i decìdan 'd andàr a dmandàr dal nutìsi ad lē a 'l urfanutròfi ma ninsòṅ a sà gnint.
Pulèmichi
Pròpria in dal méntar ch'al film 'l è vgnû fóra in di schér'm americàṅ, la pelìcula l'à muciâ sù na mùcia 'd pulèmichi par via di argumènt tratâ. Dimóndi asuciasiòṅ ch'i gh'aṅ a cōr al bèṅ di putèṅ dasfurtunâ ch'i èṅ custrét a vìv'r in di urfanutròfi i aṅ fat sù 'n sapèl puntànd al dî cónt'r al film dgénd ch'al stramnìs dal paùri e di stereòtip fals in di cunfrònt dl'adusiòṅ, dand acsè còrda a 'l risć ad lasàr di baghét sénsa genitōr. Chi lōr i s èṅ anc dâ da far par far star fóra la gint da i cìnema ch'i dàv'n Orphan[1].
Gl'asuciasiòṅ a favōr di adusiòṅ i s èṅ anc misi in cuntàt c'n al presidènt dla Warner Bros., Barry Meyer, dmandànd-'g ad tiràr via da 'l film la fraś «A gh'a d'èsar difìcil vlēr bèṅ a 'n fiōl adutìṿ a la stésa manéra 'd òṅ di tuo» che la Esther la dgiva a sò pàdar nóṿ. Inóltar 'l è stâ dmandâ che na part di bèsi tirâ sù i fùsan dâ a gl'urfanutròfi ch'i gh'ìvan biśógn e ch'a la fiṅ dal film a fus śuntâ 'n mesàǵ a favōr di adusiòṅ[2].
Culegamènt estéran
- (EN) La schéda dal film in s'l IMDb
- (IT) La schéda dal film in sal FilmTV
- (IT) La schéda dal film in sal sit dla Cunferénsa Episcupàla
Nòti
- ↑ Acùśi a 'l film ad scarésa ad DiCaprio Corriere Della Sera, 21 ad Luj dal 2009
- ↑ L'Òrfna stramaladìda la stramna la scarésa ma l'Amèrica la mónta sù Il Giornale, 21 ad Luj dal 2009