Non guardare in cantina
|
C'l artìcul chè 'l è scrit in
Miranduléś |
 Don't Look in the Basementcgnusû anc cuma The Forgotten | ||
| Non guardare in cantina | ||
 La Jessie Lee Fulton in na figùra dal film | ||
| Minga guardàr in cantìna 1973 | ||
|---|---|---|
| Regìa: S.F. Brownrigg | ||
| Scritōr: Tim Pope | ||
| Atōr: Bill McGhee • Rosie Holotik • Camilla Carr Annabelle Weenick • Gene Ross • Betty Chandler Jessie Kirby • Jessie Lee Fulton • Robert Dracup | ||
| Müsica: Robert Farrar | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
Non guardare in cantina (Minga guardàr in cantìna) 'l è 'n film ad scarésa dal 1973 ad S.F. Brownrigg ch'al 'l à anc prudót insém a Walter L. Krusz a partìr da 'n budget ad sènt-mila dòlar.
Sunt
Al dutōr Stephens (Michael Harvey) al gh'à na clìnica privàda in dua al cura di pasiènt mat cun 'l ajùt dna vècia infarméra, la Jane St. Claire (Jessie Lee Fulton), e dn'atra dutōra, la Geraldine S. Masters (Annabelle Weenick). A gh'è Sam (William Bill McGhee), un négar lubutumiśâ pròpria da lò ch'asès 'l è dvintâ bòṅ c'm al paṅ ma c'n un sarvèl da putèṅ tant ch'al śōga sèmpar cun na barchìna e al gh cata gust a magnàr di giasōi, la Jennifer (Harryette Warren), na ragasōla autìstica ch'la n vèra mai bóca e ch'la stà sèmpar da par lē, Danny (Jessie Kirby), un gigiòṅ ch'al s divertìs a far di schèrs e di daspèt a tut, Jaffee dit al “Sargìnt” (Hugh Feagin), ch'al créd 'd ès'r incóra in tèmp ad guèra in dua 'l éra armàś traumatiśâ parchè tut i sò cumpàgn i éran mòrt p'r un sò śbali, l’Allyson King (Betty Chandler), na dóna ninfòmana ch'la pésca sèmpar di óm da far-as par via ad stòri 'd amōr dasfurtunàdi ch'l'à patî, l’Harriet (Camilla Carr), na màdar dvintàda mata da quànd l'à pardû 'l sò putèṅ e ch'adès la pasa tut i dè a dar dal śnum a na bàmbula ch'la créd sò fiōla, la sgnōra Callingham (Rhea MacAdams), na vècia tarulìda ch'la gh'à di alucinasiòṅ, la pénsa ch'i fiōr i sìan i sò anvōd, e ch'la và sèmp'r adrē c'n al sò prèdichi e i sò avìś, e Oliver W. Cameron dit al “Giùdas” (Gene Ross), 'n ex magistrâ puritàṅ e dasćiòlda-crist ciucâ in dla tèsta ch'al ripét ad cuntìnuv «Mè a m ciàm Oliver W. Cameron, jure consultus, presidènt e giùdas dla cōrt 'd apèl dal sesiòṅ speciàli, dutōr in giurisprudénsa».
Un dè la Jane, stufa ad c'l ambînt lè e dòp che l’Harriet la gh i à prumìs parchè la s éra parmìsa ad tucàr la sò bàmbula, la dècid 'd alvàr al téndi e la 'l và a dir a 'l dutōr Stephens ch'l è in giardèṅ insém a 'l “Giùdas” ch'l è drē a tajàr dla légna cun na manàra. Tut 'd un trat chi lò al gh tira 'n cōlp séc in dla schina e 'l óm al casca par tèra a pēś mòrt. A riva 'd cursa la Geraldine ch'la gh la cava a far star bòṅ Oliver faghénd-ag pugiàr śò la sò manàra. Dòp che la Jane la vèṅ cupàda par l’Harriet, ch'la gh tira via 'l fiâ druànd la sò valìś, arliàda parchè l'iva catâ la bàmbula in dla sò cambra da lèt, la Masters la tōś la diresiòṅ dal manicòmi. Soquànt dè dòp a riva in clìnica la Charlotte Beale (Rosie Holotik), na śōvna infarméra ch'l'éra 'd acòrd c'n al dutōr Stephens par tacàr a lauràr lè. Anc se malvluntéra, la sgnōra Masters la la tōś. Prima ch'la tóga sarvìsi, la dutōra la gh cònta al critèri sperimentàł ad cura druâ p'r al dutōr Stephens, qvél ad lasàr lìb'r i pasièngt ad vìvar liberamènt al sò usesiòṅ in manéra 'd avér-'n in fónd ingòsa tant da paràr-li via da par lōr. Na nòt a vèṅ catàda śò da 'l lèt la Callingham sénsa piò la léngua e la Geraldine la diś ch'la s l'è tajàda via parchè dal vòlti la s fava dal mâł da par lē ma ch'l'è fòrta listés anc s'la gh'à da piò 'd utànt'an.
Dòp ch'un qualchidòṅ 'l à tajâ i câṿ dal telèfun, a riva lè al tècnig Ray Daniels (Robert Dracup) par giustàr la lìnéa parchè al s éra acòrt ch'a gh'éra quèl ch'a traśàva e ch'la gh'iva di prubléma. Dòp ès'r intrâ in cà, méntar 'l è drē a far al riparasiòṅ, a gh salta adòs cla malnéta dl’Allyson par gusàr-'s-al e lò 'l è custrét a dir-ag ch'al gh vōl bèṅ da 'l tant ch'la và adrē. Sōl in séguit Sam al cata 'l sò cadàv'r in un tanabùś e quànd al gh pòrta l’Allyson par far-ag védar cuś è sucès, lē la và fóra 'd tèsta e la decìd ad vudàr al sac cun la Charlotte.