My Little Eye
|
C'l artìcul chè 'l è scrit in
Miranduléś |
 My Little Eye
| ||
| My Little Eye | ||
 Bradley Cooper in na figùra dal film | ||
| Al mè òć pìcul 2002 | ||
|---|---|---|
| Regìa: Marc Evans | ||
| Scritōr: David Hilton • James Watkins | ||
| Atōr: Stephen O'Reilly • Bradley Cooper Kris Lemche • Laura Regan • Jennifer Sky Sean Cw Johnson • Nick Mennell | ||
| Müsica: Bias | ||
| Léngua: Ingléś | ||
| Dürä dal film: 99 minüt | ||
| Nasiōṅ: Stat Unî • Régn Unî • Frància • Cànada | ||
My Little Eye (Al mè òć pìcul) 'l è 'n film ad scarésa dal 2002 ad Marc Evans ispirâ a 'l mónd di reality show cuma 'l Gran Fradèl o anc La Talpa.
Al film 'l à muciâ sù da piò ad nóṿ migliòṅ ad dòlar esénd-an custâ tri.
Sunt
Sinc ragàs, Matt (Sean Cw Johnson), Rex (Kris Lemche), Danny (Stephen O'Reilly), l’Emma (Laura Regan) e la Charlie (Jennifer Sky) i decìd'n ad tōr part a 'n reality show in dua i gh'aṅ da pasàr siē méś ad fila srâ dènt'r a na cà sóta 'l òć dal telecàmri ch'i i tìran śò par traśmét'r-i in dirèta vint-quàt'r óri su vint-quàtar su la réda internet. S'i gh la cav'ràṅ a 'rmàgnar tut sinc lè dèntar in fiṅ a la fiṅ i gh daràṅ un migliòṅ ad dòlar p'r òṅ.
Fiṅ da subìt a pâr ch'la prudusiòṅ la faga di quèi a l'arvèrsa par far in manéra che qualchidòṅ a gh daga a muć cuma far savēr cun na létra ch'al nunòṅ ad Danny 'l è mòrt o far catàr un martèl pîṅ ad sangṿ sóta 'l cusèṅ dl’Emma. Pò al ròbi i s fànan più pēśi parchè a salta fóra anc na pistòla.
In cal mént'r al grup al mét da na banda Rex par via dal sò cumpurtamènt cìnic e p'r al fat ch'al s téggna par lò dal magnàr e dal cichi ch'al lóga in dla sò cambra. Na sira a riva òṅ ch'al pasàva da 'd lè par caś ch'al diś 'd a n savēr gnint dal śōg. A s trata 'd un śuvnòt ciamâ Travis Patterson (Bradley Cooper). Chi lò al pasa in cà la nòt, più che àtar in dal lèt dla Charlie ma minga par durmìr méntar l’Emma la dà adòs a Danny parchè la gh'à catâ al sò mudàndi in dla cambra. Quànd Travis al và via, al grup al cata 'l sò bursòṅ fóra tut sćiancâ e pîṅ ad sangṿ. Ch'a gh sia quèl ch'a traśa a dvènta ciàr quànd a s cata 'l cadàv'r ad Danny mòrt impicâ.
Rex al gh vōl andàr a fónd e al tira fóra da la bórsa 'd Travis al sò telefunèṅ par culegàr-'s a 'l sit dal prugràma. Ma 'l sit a n gh'è minga e gnanc dla reclàm ch'la dascóra 'd lōr. A gh'è sōl un sit criptâ in dua 'l spetàcul al và in ónda ma a s trata 'd un sit in dua dla gint pîna 'd bèsi la scumét su la mòrt di ragàs.