Miss Havisham
|
C'l artìcol chè 'l è scrit in
Carpśàn |
Miss Havisham l'è ùn di personàģ prinsipêl dal romàṅś dal Charles Dickens Grandi sperànsi dal 1861. L'è na sgnóra ed meśa etê fióla ed na famìja rìca, armèśa puta dòp 'd èser steda tolta in gìr da 'n murōś ch'al gh'à ciavê dimòndi besi mo che però subìt prìma dal dè e dl'ora dal matrimòni, 'l è scapê luntàn sàinsa fèr-es piò vèder. Lē la nn'ìva catê gninta ed méj che sarèr-es strìca sù in cà cui scùr sèimper sarê anc'a la lûś dal dè, e l'ìva fermê tùti el frèci di arlói ai nōv ōr meno vèint, quand 'l era saltê al só matrimòni. Mèinter ch'la steva tùt al tèimp sarèda in cà sól a la lùś ed na quelc candéla, śvèina a 'l spèć dla tulèta, chilē la s tgnìva indòs incòr al stès vistî lung dal matrimòni e l'era dvintèda śmunta, brùta e pulvràinta.
La vecia sgnuràina Havisham la tgnìva in cà na ragasóla, l'Estella, ch'l ìva vlû adotèr p'r ann armàgner propi mìa sàimper da per lē, in cla só cà sàimper voda. Miss Havisham la gh'la chèva acsè anca ed vendichèr-es a la só manéra dal tort subî, psend insgnèr a l'Estella mèinter ch'l'è drē a crèser, bela e śóvna, che chī òm i van tgnû schìs, turmintê e vinghiê da la só belèsa ed ragàsa, dai só caprìs ed ragasóla visièda e volta-bandéra.