Matteo Berrettini
|
C'l artìcul chè 'l è scrit in
Miranduléś |
_(28110478427).jpg)
Matteo Berrettini (Róma, 12 ad Mars dal 1996, a s lèś [matˈtɛːo berret'tini] in Itagliàṅ) 'l è 'n tenìsta itagliàṅ. Al dróa 'l bras dèst'r e 'l tira 'l arvèrs a dū maṅ. Al śōga sèmpar c'n un brét in cô prilâ a 'l indrē mént'r i sò cōlp più fòrt i èṅ al servìsi e 'l drit.
Berrettini 'l è élt 1,94 mét'r e 'l péśa 86 chilo. Al gh'à 'n fradèl tenìsta anc lò, Jacopo, e 'l sò scutmàj 'l è “Picchio” (Pić).
In dla sò caréra 'l à vins un turnèo ATP 250, dū turnèo Challenger e dū Futures, rivànd a ès'r al nùmar stanta-sinc dal mónd al 16 ad Luj dal 2018.
Caréra
Matteo al dvènta 'n tenìsta prufesiunìsta in dal 2014 ma in dal 2016 'l è custrét a farmàr-as p'r un brut infurtùni a 'l śnòć sinìstar. In Nuvémbar a Brésa 'l è bòṅ ad bàtar 'l spagnōl Tommy Robredo, èx nùmar sinc dal mónd, ma in finàł al céd a Luca Vanni par 7-5 0-6 3-6.
In dal 2017 al tōś part a 'l turnèo Master Mila 'd Róma par via dna carta salvàdga ma 'l pèrd a 'l prim tùran da Fabio Fognini par 1-6 3-6. In Luj al vins al challenger ad San Banadét dal Trònt baténd par 6-3 6-4 al sèrb Laslo Đere e 'l gh la cava a rivàr a 'l 173śum pòst dal ranking. In Agóst al śōga n'atra finàl a Pòrtrōś ma 'l céd par 7-6 6-7 3-6 a Serhij Stachovs'kyj. Al finìs 'l an cuma 135 dal mónd dòp n'atra finàl pardùda a Ìstanbul.
In dal 2018 al tōś part a gl'Australian Open cuma pardènt furtunâ ma 'l gh'à da lasàr strada a 'l francéś Adrian Mannarino. In Favràr al vins al sò secónd tìtul challenger a Bèrgam, in tri set cóntar Stefano Napolitano. Al rumàṅ al s davśìna acsè a la top sènt. In Mars a Indian Wells al céd dòp dagnóra tri óri 'd śōg a Daniil Medvedev, pò al riva in finàl in dal challenger 'd Irving (6-2 3-6 1-6 da 'l kazàk Michail Kukuščkin). In Maǵ al riva a 'l secónd tùr'n a Róma pardénd da Alexander Zverev mént'r a 'l Roland Garros al riva a 'l tèrs tùran batû da 'l austrìac Dominic Thiem par 3-6 7-6 3-6 2-6. A Wimbledon al s cava la sudisfasiòṅ ad vìnsar cóntar 'l americàṅ Jack Sock, nùmar daśdòt dal mónd, armuntànd dū set sóta. A Båstad in Śvèsia al vins cóntar 'l argintèṅ Leonardo Mayer par 3-6 6-3 6-4 ma pò Berrettini al ciàpa la paga da 'l śvìsar Henri Laaksonen ch'al gh lasa sōl quàtar śōg. La stmana dòp al tōś part a 'l Swiss Open ad Gstaad in du 'l riva in finàl baténd prima 'l spagnōl Feliciano López par 6-4 6-3 e pò 'l qualificâ èstun Jürgen Zopp par 6-4 7-6. Al tenìsta rumàṅ al pòrta pò a cà 'l tìtul baténd par 7-6 6-4 al spagnōl Roberto Bautista Agut.