Mastuplàstica

Da Wikipedia.
C'l artìcul chè 'l è scrit in Miranduléś Emiliàn
La tenìsta Simona Halep, eśèmpi ad mastuplàstica caladōra par śugàr méj[1].
L'atōra Angelina Jolie, eśèmpi ad mastuplàstica caladōra par paràr via 'l risć ad càncar[2].
La soubrette Carmen Di Pietro, eśèmpi ad mastuplàstica śuntadōra cun di prubléma ad sćiòp[3].


La Mastuplàstica l'è n'uperasiòṅ chirurgìca fata a 'l téti ad cal dóni o di trans par di mutìṿ i più difarènt, estètic e anc sanitàri.

La dóna ch'la s è fata impinìr da piò 'l téti a 'l mónd, sédas chilo, l'è la mudèla Mayra Hills[4].

Caśìstichi

A secónd dla caśistica 'd riferimènt, la mastuplàstica la ciàpa di nóm difarènt.

  • Mastuplàstica śuntadōra: 'l intervènt al sarvìs p'r avér dal téti più grôsi. A la dóna (o a i trans) i gh vèn'n insfilsàdi dèntar dal pròteśi fiàpi "a gósa" fati c'n un gus ad silicòṅ e impinìdi cun dal gèl ad silicòṅ, d'l idrugèl, dl'àqua salàda e via dascurénd.
  • Mastuplàstica caladōra: 'l intervènt al sarvìs p'r avér dal téti più pìculi quànd i èṅ tròp grôsi e pēśi e i pōlan dar di prubléma a la schina e a la culòna vertebràla ma anc par di mutìṿ sanitàri preventìṿ par paràr via al risć dal càncar. I castròṅ ch'i gh'armàgnan dòp al taj i èṅ ad sòlit a fórma 'd "T" arbaltàda anc se dal vòlt a s pōl śbuśìr i cavdèṅ par lasàr di ségn ch'i s véd'n a fadìga. In gènar i castròṅ i èṅ tant più grandi quànta più cìcia e mùscui a gh'è da tiràr via.
  • Mastupesìa: 'l intervènt al sarvìs par mét'r a pòst al téti quànd, c'n al pasàr dal tèmp, i dvèntan fiàpi o i càscan śò. Quànd al téti i èṅ anc vōdi i s pōl'n anc impinìr naturalmènt cun dal pròteśi.

Intervènt

P'r insfilsàr al pròteśi in dal téti a gh'è quàtar stradi a secónd dla sò fórma e a i deśidèri dla pasînta. I taj i pōl'n èsar fat:

  • in di cavdèṅ;
  • in dal pighi sóta 'l téti;
  • in dal laséni;
  • in d'l umbrìgul (par via 'd un tub ch'al cùcia in sù 'l pròteśi e pò al li gònfia cum un palunsèṅ);

Tèmp

In tut al manéri l'uperasiòṅ la gh'à biśógn dna bèla śdòrmia generàla. La dóna la gh'à 'd armàgn'r in clìnica o a 'l uśdàł par dū o tri dè e pò la gh'à da tgnir-'s adrē e far pôca fadìga par quàtar/siē stmani.

Cóst

'N intervènt ad mastuplàstica al cósta in gènar da sèt-mila e sinc a nóṿ-mila euro a 'l incìrca[5].

Nòti