Maschio, femmina, fiore, frutto
|
C'l artìcul chè 'l è scrit in
Miranduléś |
 Maschio, femmina, fiore, frutto
| ||
 L'Anna Oxa in na figùra dal film | ||
| Masć, fémna, fiōr, frut 1979 | ||
|---|---|---|
| Regìa: Ruggero Miti | ||
| Scritōr: Gianni Barcelloni Corte Lidia Ravera • Enzo Ungari | ||
| Atōr: Anna Oxa • Giovanni Crippa • Massimo Boldi Ninetto Davoli • Chiara Moretti • Benedetta Fantoli Paola Rinaldi • Andrea Aureli • Claudio Ferraro | ||
| Müsica: Ivano Fossati | ||
| Léngua: Itagliàṅ • Ingléś | ||
| Dürä dal film: 97 minüt | ||
| Nasiōṅ: Itàglia | ||
Maschio, femmina, fiore, frutto (Masć, fémna, fiōr, frut), cgnusû anc cuma La ragazza superstar, l'è na cumèdia muśicàla itagliàna dal 1979 ad Ruggero Miti giràda in Pùglia e a Róma.
La prutagunìsta Anna Oxa, dasfrutànd 'l aspèt ch'la gh'iva in alóra mèś masć e mèś fémna, la fà chè la part 'd un fradèl e dna surèla pugléś e la canta soquànti canti cuma Pagliaccio azzurro e Notti per due, cover in itagliàṅ ad Because the night dla Patty Smith.
In un cameo in discutéca a gh'è anc Jimmy il Fenomeno.
Sunt
L’Anna Vivente (Anna Oxa) e Tony (Anna Oxa) i èṅ dū śmèi ch'i vìv'n a Bari. La prima l'è bòna a cantàr, al secónd al juta sò sîṅ mecànig, Nicola, in ufisìna. Quànd a mōr sò pàdar, stanc ad ciapàr di sćiafòṅ da sò màdar, i dū i partìsan par Róma tgnénd adrē a 'l sógn ad lauràr in dal mónd dal spetàcul. L’Anna la dmanda 'n pasàǵ a 'n camiunìsta méntar Tony al scaròsa dū turìsti rumàni, la Sara e la Mara, che però i gh pòrtan via la màchina a la prima ucaśiòṅ bòna.
Tony in na quàlc manéra al riva a Róma in dal lucàl par sōli dóni L'isola di Dacia in du i s càtan al dū ladri. Sèg a gh'è anc un fnòć tedésc (Giovanni Crippa) ch'l iva fat al viàś cun l’Anna e la Caterina, na ragàsa ch'la 'l juta a pascàr-li in na discutéca par gay, pò in 'n àtar lucàl ciamâ Make up. Balànd a 'l ritm dla discomusic, Tony al fà 'l galét cun tut al dóni ch'i gh pàsan dintóran, pò al decìd 'd armàgnar lè tuta la nòt a durmìr. In cal méntar l’Anna la finìs in mèś a 'n grup ad bòṅdagnìnt piucióś. Òṅ ad qvist chè (Ninetto Davoli) al gh fà védar cuma a s fà a catàr sù di bèsi da la gint par magnàr quèl, cantàr e balàr p'r al stradi.
L’Anna la và a 'n pruvèṅ par na cà discugràfica e 'l diretōr (Massimo Boldi) al decìd ad tōr-la dand-'g al nóm 'd art ad Sally Sexy.