Martyrs (film 2008)

C'l artìcul chè 'l è scrit in Miranduléś

Màrtir 2006
Martyrs
La Morjana Alaoui in na figùra dal film
Regìa: Pascal Laugier
Scritōr: Pascal Laugier
Atōr: Morjana Alaoui • Jean-Marie Moncelet Mylène Jampanoï • Catherine Bégin • Erika Scott Robert Toupin • Juliette Gosselin • Xavier Dolan
Müsica: Alex Cortés • Willie Cortés
Léngua: Francéś
Dürä dal film: 99 minüt
Nasiōṅ: Frància • Cànada

«

Cal film chè al móstra dal figùri dimóndi ma dimóndi viulènti e difìcili da cumpatìr-as. La viśiòṅ e la cumprensiòṅ i gh'aṅ biśógn ad spetadōr preparâ.»

(Tagline dal film)

Martyrs (Màrtir) 'l è 'n film ad scarésa francéś e canadéś dal 2008 scrit e dirèt par Pascal Laugier.

La pelìcula, custàda dū migliòṅ e òt 'd euro, l'è stada preśentàda a 'l 61śum Fèstival ad Cannes.

Sunt

Dòp che quìnd'ś an prima da pìcula l'iva patî dal turtùri da part dn'urganiśasiòṅ segréta, la Lucie (Mylène Jampanoï), cardénd 'd avēr catâ la vila di sàdig che tant i l'ìvan fata patìr, la tōś sèg un sćiòp e la và a masàr-i tut. A mōr acsè al padròṅ ad cà (Robert Toupin) méntar 'l éra drē a far clasiòṅ, sò mujēr (Patricia Tulasne) e i sò dū fiōi inusènt, Antoine (Xavier Dolan) e la Marie (Juliette Gosselin).

Dòp avēr savû par telèfun dal masèl fat, a riva lè la sò amìga Anna (Morjana Alaoui) par jutàr-la ma 'l è tròp tard parchè la ragàsa, usesiunàda da qvél ch'a gh'éra sucès e cardénd 'd avēr sèmpar na criatùra ch'la gh dà adòs par via dal tràuma, la s taja la góla. A 'l impruvìś i rìvan lè di àtar mémbar dl'urganiśasiòṅ, c'n a cap na vècia sgnōra (Catherine Bégin), ch'i mét'n in cadéni la pòvra Anna e pò i tàc'n a turturàr-la, piciànd-la e dand-ag da magnàr dla paparùcia.

Qvél ch'i vōlan far faghénd dal mâł a 'l śōvni, ch'i èṅ più adàti di óm, l'è catàr di “màrtir” e minga dal “vitmi”. Qvisti chè i èṅ dal parsòni ch'i n èṅ briśa bòni 'd cumpatìr-'s al dulōr e i cédan a gl'alucinasiòṅ e a 'l delìri dvintànd istèrichi a 'l cuntràri di màrtir ch'i s làs'n andàr a 'l patimènt trasfigurànd-as. La sgnōra la spéra che l’Anna la pòs dvintàr na màrtir, un quèl dimóndi difìcil, par far-as dir da lē cuś a gh'è in c'l àtar mónd.

Culegamènt estéran