Manifestasiòṅ Unìr la Dèstra dal 2017

Da Wikipedia.
C'l artìcul chè 'l è scrit in Miranduléś Emiliàn


'L Unite the Right rally, cgnusû anc cuma Charlottesville rally, l'è stada na manifestasiòṅ ch'la s è tgnuda 'l 11 e 'l 12 'd Agóst dal 2017 in dla sità 'd Charlottesville in Virgìgna.

Scóntar fra suprematìsta biànc e pulisìa
Suprematìsta biànc cun la maja di stat cunfederâ

L'è stada urganiśàda par di mémb'r ad dèstra ch'i prutestàvan cóntar la deciśiòṅ dal sìndig demucràtic dla sità Mike Signer e dal cunsìli cumunàł ad tiràr śò la statṿa, fata in dal 1924, dal generàł Robert E. Lee ch'in dla guèra 'd secesiòṅ americàna 'l iva cmandâ 'l trupi di stat sudìsta 'd Dixie Land ch'i vlìvan tgnir-as stric i séruv négar ch'al presidènt elèt Abraham Lincoln invéci al vliva lasàr lìbar.

In alóra la Virgìgna l'éra 'l stat più a nòrd dla cunfederasiòṅ e l'iva patî al dastàc dla Virgìgna Ucidentàla ch'la vliva armàgn'r invéci c'n i Stat Unî. Adès Charlottesville l'è dvintàda na sità demucràtica tant ch'in di elesiòṅ p'r elèś'r al presidènt americàṅ dal 2016 la Clinton l'à ciapâ chè al 79,7% di vōt cónt'r al 13,2% ad Donald Trump.

Urganiśàda par Jason Kessler, la manifestasiòṅ la mitìva insém suprematìsta biànc, nasiunalìsta biànc, neo-cunfederâ, neo-naśìsta, mémbar dal Ku Klux Klan armâ e milisiàṅ paramilitàr. Na cóntar-manifestasiòṅ 'd anti-fasìsta e 'd sustenidōr di dirìt sivìl l'è stada misa in pē par prutestàr sèg. Durànt i scóntar, un ragàs ad vint an suprematìsta biànc d'l Ohio, Alex Fields Junior, 'l à druâ na màchina par métar sóta i mémbar dal curtèo rivàł masànd na ragàsa 'd trénta-dū an, l’Heather Meyer, e frénd-an àtar daśnóṿ.

Al presidènt Donald Trump 'l à dit ch'«a n gh'è minga pòst par cal gènar chè 'd viulénsa in Amèrica», sénsa far paròla di respunsàbii, e pò 'l à invitâ tut a «unìr-as e a cundanàr 'l òdi e la viulénsa». Dòp che 'l èx cap dal Ku Klux Klan David Duke al gh'à dit «Guàrda't in dal spèć e arcòrda ch'i èṅ stâ gl'americàṅ biànc a rigalàr-at la presidénsa»[1], al presidènt al càmbia versiòṅ dand la cólpa a tut a la stésa manéra[2].

Culegamènt estéran

Nòti