Hillary Clinton

Da Wikipedia.
C'l artìcul chè 'l è scrit in Miranduléś Emiliàn
L'Hillary Clinton tòlta śò in dal 2009


L’Hillary Diane Rodham, da spuśàda cgnusùda méj cuma Hillary Clinton (Chicago, 26 'd Utóbar dal 1947, a s lèś [ˈhɪləɹi daɪˈæn ˈɹɑdəm ˈklɪntən] in ingléś) l'è na pulìtiga americàna, mémbar dal partî demucràtic, èx segretària 'd stat e senadōra 'd New York da 'l 2001 a 'l 2009.

In dal 2016 l'à vins cóntar Bernie Sanders al primàri dal sò partî dvintànd la candidàda demucràtica in dgl'elesiòṅ presidensiàli di Stat Unî. Al sò rivàł 'l è 'l republicàṅ Donald Trump.

Prima ad dvintàr na pulìtiga, l’Hillary l'à fat ad mistēr l'avucàta, l'insgnànta 'd dirìt penàł e l'è stada na mémbra di cunsìli 'd aministrasiòṅ dal multinasiunàli Walmart e Lafarge.

Biugrafìa

Nada a Chicago in d'l Illinòis, la crés a Park Ridge in na famìja republicàna. In dal 1969 la s làurea cun unōr in siénsi pulìtighi dòp èsar-'s davśinàda dimóndi a i demucràtic. Dū an dòp la cgnós Bill Clinton a Cambridge (Massachusetts) méntar la lauràva p'r i putèṅ dasfurtunâ. In dal 1975 la spóśa Bill a Fayetteville (Arkansas) prima che sò marè al dvintìs al guvernadōr ad cal stat lè par dód'ś an. In dal 1980 a nas sò fiōla Chelsea.

Bill, l'Hillary e Urteaga in dal 2015

In di an Nuànta la dvènta la first lady di Stat Unî cun sò marè ch'al bat prima George H. W. Bush in dal 1992 e pò Bob Dole in dal 1996. In chi an lè la próa a far dvintàr léǵ un sò prugèt ad dar l'asisténsa sanitària universàla ma la n gh la cava briśa.

In dal 2008 la próa a ciapàr la candidadùra dal sò partî par dvintàr la prima presidènta dóna di Stat Unî ma la pèrd al primàri cóntar Barack Obama anc s'l'éra stada lē a ciapàr più vōt. In dal 2009 però chi lò al la sarnìs cuma segretària 'd stat in dal sò prim mandâ. La Clinton la gh próa incóra quàt'r an dòp e 'sta vòlta la gh la cava sarnénd 'l èx guvernadōr dla Virgìgna Tim Kaine cuma vice.

Culegamènt estéran