Mandingo (film)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Mandingo
Mandingo (film).png
Perry King in na figùra dal film
Mandìng
1975
Regia: Richard Fleischer
Scritùr: Kyle Onstott
Jack Kirkland • Norman Wexler
Atùr: James MasonPerry KingKen Norton
Susan GeorgeRichard WardBrenda Sykes
Lillian HaymanRoy PooleJi-Tu Cumbuka
Paul BenedictBen MastersReda Wyatt
Müsica: Maurice Jarre
Lengua: IngléśFrancéś
Dürä dal film: 127 minüt
Nasiòṅ: Stat Unî


«
Spetâ'v tut qvél ch'un schérum dal cìnema al n gh'à mai abû 'l curàǵ 'd mustràr prima. Spetâ'v la véra.»
(Tagline dal film)


Mandingo (Mandìng) 'l è 'n film dramàtic e 'd asiòṅ americàṅ dal 1975 ad Richard Fleischer, prudót par Dino De Laurentiis, trat da 'l best seller umònim dal 1957 ad Kyle Onstott. Al gh'à abû 'n séguit 'l an dòp da 'l tìtul Drum - L'ultimo Mandingo.

'L è stâ girâ in Luiśiàna in du èx piantagiòṅ véra, la Ashland-Belle Helene Plantation (a Geismer) e la Houmas House Plantation (a Burnside).

Sunt

Prima dla guèra 'd secesiòṅ americàna, in dal sud fónd di Stat Unî, Warren Maxwell (James Mason) 'l è 'n vèć véduv c'n un sit ad tèra e na piantagiòṅ ciamàda Falconhurst in du 'l fà lauràr un muć ad séruv négar cuma Agaménun (Richard Ward), pagajâ fòrt c'n un paddle p'r avēr imparâ a lèś'r e a scrìvar, la Lucrezia Borgia (Lillian Hayman) ch'la tîṅ adrē a la cà e ch'l'à fat vint-quàtar fiōi, la Lucy (Beatrice Winde), sò fiōla Big Pearl (Reda Wyatt) dla rasa mandìng e 'l arvèrs Ciceròṅ (Ji-Tu Cumbuka), vindû insém a àtar dū a 'l mercànt ad séruv Brownlee (Paul Benedict).

Warren al gh'à 'n fiōl śōvan ciamâ Hammond (Perry King) armàś sòp a siē an da quànd un cavàl al gh'à schisâ 'n śnòć. Un dè chi lò al riva a la piantagiòṅ insém a 'l veterinàri Redfield (Roy Poole) par viśitàr la Big Pearl ch'la gh'à 'l gòmit e la févra élta. Al mèdag, sinténd ch'l'è incóra vìrgin, al diś ch'l à capî la natùra dal sò mâł ch'a s ciàma “vója 'd masć”, o i gh al dànan o sinò la scòpia, pò 'l sugerìs a Hammond ad dar-'g-la lò la madśìna. Par far pasàr 'l udōr i gh pōlan far far di bagn cun dal manganâ 'd putàsi e 'l è qvél ch'a gh fà la Lucy arcmandànd-'s ad far a mōd e 'd dir gràsie a la fiṅ a 'l padròṅ.

Esènd che Warren al gh'à i reumatìśum, Redfield al gh cunsìlia 'd pugiàr i pē par soquànt tèmp su la pansa 'd un putèṅ négar par psēr trasferìr-'g al mâł a lò e 'l padròṅ 'l al tōś in paròla.

Quànd Charles (Ben Masters), cuśèṅ 'd Hammond e fiōl dal magiōr Woodford (Stanley J. Reyes), al và a càtar i Maxwell par dmandàr in prèst di bèsi par la sò famìja, Warren al diś a sò fiōl 'd andàr sèg, giusà ch'a gh pòsa andàr bèṅ sò fiōla Blanche (Susan George) da spuśàr ch'a sarév anc óra fra 'l àtar. Lung la via i dū cuśèṅ i s férman par punsàr a la piantagiòṅ ad Larry Wallace (Ray Spruell), un vèć amìg ad Warren. Hammond al gh admànda ad dar-'g in prèst al sò séruv mandìng Serse par far-ag muntàr la Big Pearl in manéra 'd avēr-ag di putèṅ nég'r ad rasa. Larry al gh rispónd che purtròp lì lò 'l è mòrt tri méś prima par n'incurnàda 'd un tòr, pò al gh śibìs dū négri, la Katy e la Ellen (Brenda Sykes), par far sès. Charles al lasa la vìrgin a c'l àtar méntar lò al sarnìs la Katy da viulentàr e da piciàr cun la sintùra dal braghi, tant 'l è sicûr ch'a gh piàśa anc a lē. Hammond invéci 'l è difarènt, al n vōl briśa èsar catìṿ c'n al négri ch'al s pòrta a lèt.

Hammond, prima 'd spuśàr-as cun la Blanche, al s còmpra 'n négar mandìng, Ganimēd dit Mede (Ken Norton), da druàr in di cumbatimènt a New Orleans, e pò 'l s pòrta a cà anc la Ellen. La Blanche, ch'l'è gelóśa 'd lē parchè sò marè al s la pòrta sèmp'r a lèt, la taca a druànd la scùria sèg dand-ag dla rója, dla vaca, dla caggna e dla nimàla, specialmènt quànd la sènt ch'l'è gravda. Butànd-la śò p'r al scali la gh fà pèrd'r al putèṅ pò, minga cuntènta, la custrìnś Mede a gusàr-la par far para cun Hammond.

Culegamènt estéran