La signora nel cemento
|
C'l artìcul chè 'l è scrit in
Miranduléś |
 Lady in Cement
| ||
| La signora nel cemento | ||
 La Christine Todd in na figùra dal film | ||
| La sgnōra in dal cimènt 1968 | ||
|---|---|---|
| Regìa: Gordon Douglas | ||
| Scritōr: Marvin H. Albert • Jack Guss | ||
| Atōr: Frank Sinatra • Raquel Welch • Martin Gabel Richard Conte • Lainie Kazan • Richard Deacon Virginia Wood • Richard Deacon • Christine Todd | ||
| Müsica: Hugo Montenegro | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî | ||
La signora nel cemento (La sgnōra in dal cimènt) 'l è 'n thriller americàṅ dal 1968 ad Gordon Douglas in du 'l prutagunìsta Frank Sinatra al mét par la secónda vòlta i pagn d'l investigadōr privâ Tony Rome dòp L'investigatore d'l an prima.
La pelìcula l'è stada giràda c'n un budget ad tri migliòṅ e mèś ad dòlar 'd in alóra.
Sunt
Méntar 'l è drē a pascàr al teśôr di galeòṅ spagnōi ch'i èṅ andâ a fónd in dal 1591 in di aqui fra Miami e Key Biscayne, 'l investigadōr privâ Tony Rome (Frank Sinatra), èx agìnt al pulisìa, al cata lè sóta 'l còrp dna biónda nûda c'n i pē insfilsâ in un blòc ad cimènt druâ dònca par far sparìr al cadàvar. Dòp èsar scampâ a 'n atàc ad squâi, Tony al cònta incòśa a 'l tenènt Dave Santini (Richard Conte). L'autupsìa la diś ch'la dóna, incóra sénsa nóm, l'è stada masàda cun na scurtlàda in dla pansa.
In séguit un delinquènt ch'al tîṅ adrē a 'n caśèṅ ad cal bandi lè, Waldo Gronsky (Dan Blocker), al gh śibìs un lavursèṅ, qvél ad catàr na sèrta Sandra Lomax (Christine Todd), na dóna ch'la gh'à fat un brut tîr e ch'la lavóra balànd cavàda śò in un night, al „Flora Dora Club“, purtâ avànti da 'n fnòć ciamâ Danny Yale (Frank Raiter). 'L 'investigadōr al próa a far dal dmandi a la ragàsa ch'la spartìs 'l apartamènt cun la Sandra, la Maria Baretto (Lainie Kazan), ma qualchidòṅ al la fà fóra prima ch'la pòsa vèrar bóca sèg.
Cuntinuànd al sò indàśin, in du 'l rénd cònt ch'al cadàvar l'éra pròpria qvél dla Lomax, Tony al cgnós na ragàsa c'n al visi dla butìglia ciamàda Kit Forrest (Raquel Welch) ch'l'iva tòlt part a na fèsta insém a la Sandra la nòt prima ch'la sparìs. La Kit la viṿ sóta la prutesiòṅ dal boss Al Mungar (Martin Gabel) ma Tony 'l taca listés na relasiòṅ sèg.