La scelta di uccidere

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Engaged to Kill
La scelta di uccidere
Scelta di uccidere.png
La Isabell e Zamprogna in na figùra dal film
La sélta 'd masàr
2006
Regia: Matthew Hastings
Scritùr: Alan Moskowitz
Atùr: Maria del MarDominic Zamprogna
Joe LandoKatharine IsabellPeter DeLuise
Paul McGillionDavid LovgrenBryce Hodgson
Anne Marie DeLuiseDaniella Evangelista
Müsica: Daryl Bennett
Lengua: Ingléś
Dürä dal film: 94 minüt
Nasiòṅ: Stat UnîCànada


«
Al prumési a gh'è da mantgnìr-li... a tut i cóst.»
(Tagline dal film)


La scelta di uccidere (La sélta 'd masàr) 'l è 'n thriller americàṅ e canadéś fat par la televiśiòṅ dal 2006 ad Matthew Hastings. In Itàglia 'l è cgnusû anc c'n al tìtul ad La vendetta ha i suoi segreti (La vindéta la gh'à i sò segrét).

'L è stâ girâ in Cànada a Vancouver c'n un budget stimâ 'd un migliòṅ e quàt'r ad dòlar.

Sunt

Robert Lord (Joe Lando) 'l è 'n óm 'd afâr cun na mujér pediàtra, l’Abby (Maria del Mar), na fiōla ad daśnóṿ an, la Maddy (Katharine Isabell), e 'n masćèṅ ad quatórdas, Corey (Bryce Hodgson), ch'l è sèmp'r inculâ a 'l computer a śugàr. Na sira l’Abby la vèṅ purtàda via da dū delinquènt ch'i vōl'n un riscàt 'd un migliòṅ ad dòlar. I pat i èṅ ciàr: o Robert al gh i pòrta in vint-quàt'r óri sénsa dir gnint a la pulisìa, lasànd-i in un bidòṅ dal rusc in campàggna, o sinò lē la mōr.

Robert al cata sù tut qvél ch'al pōl e al gh i dà ma 'l cap di rapidōr, Ivan, al decìd ad cupàr-la listés parchè la mèdaga l'iva vdû in fàcia la ghigna dla sò muróśa, la Sally (Daniella Evangelista), ch'la 'l à jutâ sprand ad spuśàr-al, far di bèsi e andàr a vìvar sèg in di Hawaii. La Maddy la naśa quèl e a 'l ùltim minùt la gh la cava a scapàr via da 'l camper in du l'éra stada tgnuda parśunēra butànd-as fóra p'r un finastrèṅ. A lē a gh và bèṅ, la sa śbraga sōl na gamba, minga a la Sally ch'la mōr cascànd śò in sla strada durànt al viàś.

Dòp avér pagâ 'l riscàt Robert 'l è in buléta sparàda, al fà fadìga a dar indrē di bèsi a 'l banchi. A gh dà na maṅ Lester (Paul McGillion) ch'a s dà da far par dar-ag d'l àtar tèmp sprand ch'in cal mént'r al pòsa véndar dū sò barchi. In cà 'l ròbi i vànan mâł parchè l’Abby la gh'à sèmp'r al magòṅ e la n gh'à mai vója 'd gusàr a 'l cuntràri ad cla malnéta dla Maddy ch'la s è catàda 'n muróś nóṿ, Nicholas Morgan (Dominic Zamprogna) dit Nick. A s vèṅ a savēr che la Sally la s ciamàva Christine Lawrence e ch'l'éra scapàda 'd da siē méś. Méntar gl'indàśin dla detective Burns (Amanda Tapping) i vàn'n avànti, a s fà viṿ Ivan ch'al masa Lester in d'l asinsōr a scurtlàdi.

Na sira la Maddy la ciàma a séna Nick par far-al cgnós'r a sò màdar, Robert 'l è via a 'l salòṅ naùtic par dmandàr a 'l sò ex sòci Crawford Blake (Peter DeLuise) ad jutàr-'l a catàr di cumpradōr. Più tard, méntar la Maddy l'è in salòt da par lē, a s insfìlsa dènt'r un làdar ch'al gh mét al maṅ adòs, par furtùna ch'a riva śò Nick sinténd di stus e 'l al para via anc s'al s fà mâł a la pansa śbliśgànd adòs a 'n taulèṅ ad vēdar e bcand-as na scurtlàda, in tut al manéri gnint in tut. Ma l'è tuta na cumèdia: Ivan e Nick i èṅ la stésa parsòna, Patrick Stiles. Al ragàs al vōl sōl far-'g-la pagàr cara a l’Abby e a la sò famìja.

Culegamènt estéran