La prima notte del dottor Danieli, industriale, col complesso del... giocattolo
|
C'l artìcul chè 'l è scrit in
Miranduléś |
 La prima notte del dottorDanieli, industriale, col complesso del... giocattolo | ||
 Buzzanca e la Katia Christine in na figùra dal film | ||
| La prima nòt dal dutōr Danieli, industriàł, c'n al cumplès dal... śugàtul 1970 | ||
|---|---|---|
| Regìa: Giovanni Grimaldi | ||
| Scritōr: Bruno Corbucci • Giovanni Grimaldi | ||
| Atōr: Lando Buzzanca • Françoise Prévost Katia Christine • Alfredo Rizzo • Carlo Sposito Saro Urzì • Ira von Fürstenberg • Enzo Garinei Linda Sini • Renato Malavasi • Ileana Rigano | ||
| Müsica: Riz Ortolani | ||
| Léngua: Itagliàṅ | ||
| Dürä dal film: 93 minüt | ||
| Nasiōṅ: Itàglia | ||
La prima notte del dottor Danieli, industriale, col complesso del... giocattolo (La prima nòt dal dutōr Danieli, industriàł, c'n al cumplès dal... śugàtul) 'l è 'n film da rìdar spurcaciòṅ dal 1970 ad Giovanni Grimaldi, girâ a Acireàł, trat da la cumèdia „Aragòsti 'd Sicìglia“ ad Bruno Corbucci e ad Giovanni Grimaldi. La culòna sunóra l'è dal mìstar Riz Ortolani.
In Itàglia, quànd 'l è vgnû fóra, 'l à muciâ sù dimóndi tant che sōl M*A*S*H ad Robert Altman 'l à fat méj in cla stagiòṅ lè.
Sunt
Al dutōr Carlo Danieli (Lando Buzzanca) 'l è 'n industriàł sicigliàṅ ch'a gh piàś dimóndi cal dóni e 'l è anc un squàsa-marléti 'd prim órdan tant ch'al gh'à dgl'amànti dapartùt, anc in dal sò ufìsi dascurénd dla sò segretària, la Teresa Durini (Ileana Rigano). Adès però 'l à decìś dòp dū an ad fidansamènt ad métar la tèsta a pòst spuśànd l’Elena (Katia Christine), la fiōla dna védva cun di bèsi ch'la 'n à saplî tri di marè, la Virginia (Françoise Prévost).
La prima nòt però Carlo al patìs al mâł dla lumàga parchè al gh'à sèmp'r abû a che far cun dal rój méntar l’Elena l'à decìś ad rivàr vìrgin a 'l matrimòni e qvést chè 'l è 'n fat ch'al 'l inibìs. A riva 'l dutōr (Saro Urzì) ch'al gh diś che lò al gh'à 'l “cumplès dal śugàtul”: al 'l à vlû acsè tant ch'adès al gh'à paùra d' śbragàr-al. Par na giurnàda al gh'à da pinsàr a quèl àtar e pò a s giùsta incòsa. Quànd però al mèdag al pasa par la hall d'l hutèl al cònta tut.
La Virginia la naśa quèl e la mónta sù p'r al bèṅ ad sò fiōla. Al sò tri bonànmi, in dal sò primi nòt sèg, i n éran gnanc più bòni 'd dascórar da 'l tant ch'i gh'ìvan dâ śò méntar Carlo al ciàcara, al ciàcara ma più che 'l „uréć fiṅ“ a pâr ch'al gh'àppia, par lē, 'l „urciòṅ fnòć“. Tut al cuntràri ad Federico (Alfredo Rizzo) che, sibèṅ al gh'àppia vint-i-òt an da piò dla sò spóśa, la Laura (Ira von Fürstenberg), amìga dl’Elena, al gh dà dèntar cuma 'n uragàṅ, al śbraga i lèt, al n è mia 'n óm ma 'n martèl pneumàtig, al fà quàtar “punsadìni” a 'l dè.
La Virginia l'órdna 'l prànś par sò śéndar, spaghét a 'l pévar e bistèca a 'l pavrunsèṅ, pò i dū spóś i partìsan p'r un viàś in màchina p'r a n pinsàr-ag minga. A pinsàr-'g a gh pèns' invéci sò màdar che par védar se lò 'l è 'n óm dabòṅ la s mét a balàr sèg un lènt. Stand anvlupàda sèg, acsè strica, la gh'à la manéra 'd tastàr ch'l è “in gran fórma” e ch'l è “prònt”, la 'l à preparâ par sò fiōla. L’Elena la gh salta adòs in dla cambra da lèt cuma s'la gh'is al diàv'l adòs ma a n sucéd gnint, cum a 'l sòlit.