La morte dietro la porta
|
C'l artìcul chè 'l è scrit in
Miranduléś |
 Deathdream o anc Dead of Night | ||
| La morte dietro la porta | ||
 Richard Backus in na figùra dal film | ||
| La mòrt da drē da 'l us 1972 | ||
|---|---|---|
| Regìa: Bob Clark | ||
| Scritōr: W.W. Jacobs • Alan Ormsby | ||
| Atōr: Richard Backus • Jane Daly • Lynn Carlin Henderson Forsythe • Mal Jones • John Marley Anya Ormsby • Michael Mazes • Arthur Anderson Arthur Bradley • Virginia Cortez • Alan Ormsby | ||
| Müsica: Carl Zittrer | ||
| Léngua: Ingléś | ||
| Dürä dal film: 88 minüt | ||
| Nasiōṅ: Cànada • Régn Unî | ||
La morte dietro la porta (La mòrt da drē da 'l us) 'l è 'n film ad scarésa canadéś dal 1972 ad Bob Clark, al regìsta ad Porky's, ch'al tōś ispirasiòṅ da 'l racònt cic The Monkey's Paw ad W.W. Jacobs. 'L è stâ girâ a Brooksville in Flòrida spendénd 235.000 dòlar a 'l incìrca.
In di Stat Unî 'l è vgnû pò fóra in dal sali sōl dū an dòp ch'l è stâ girâ, in d'l Agóst dal 1974.
Sunt
[mudéfica la surzéia]Durànt la guèra in Vietnam, al suldâ americàṅ Andy Brooks (Richard Backus) al patìs na sćiuptàda ch'la 'l fà cascàr śò par tèra. Méntar 'l è drē a murìr, prima 'd saràr i sò òć, al sènt in tèsta la vōś ad sò màdar Christine (Lynn Carlin) ch'la gh siga «Andy, tè at turnarà a cà, at gh'à da far-al, 't 'l à prumìs». Soquànt tèmp dòp la sò famìja la ricév la nutìsia dla sò mòrt in cumbatimènt. Al pàdar Charles (John Marley) e sò surèla Cathy (Anya Ormsby) i tàc'n a piànśar ma la Christine la s arlìa sèg parchè la n pōl briśa crédar ch'a sia véra. Cla nòt lè però qualchidòṅ al busa a 'l us: a s trata pròpria 'd Andy cun la sò unifórm adòs ch'l è turnâ a cà, saṅ cuma 'n còran a pâr ad védar. La famìja la 'l tōś dèntar cun un pēś in méno in dal cōr, cardénd pròpia ch'l eśèrcit al s fus sbaliâ a scrìv'r-'n al nóm.
In di dè a vgnir, Andy al taca a cumpurtàr-'s in na manéra strâna, al s pasa 'l tèmp sénsa far gnint, sintâ in na scrana, e miténd-'s adòs di uciài nég'r anc ad dè. In cal méntar la pulisìa dal pòst la taca a indagàr su 'l masamènt 'd un camiunìsta catâ cun la góla tajàda e sénsa sànguv. Chi lò, prima 'd èsar cupâ, 'l iva dit 'd avér dâ 'n pasàǵ a 'n suldâ ch'l éra drē a far 'l autostop.
Ad nòt a Andy a gh vîṅ vója ad móv'r-as e ad dar-as da far e a gh'è 'n mutìṿ: al sò còrp 'l è mòrt, mars pódag e sénsa sànguv viṿ dèntar, e par scampàr al śōvan al gh'à da far dal trasfuśiòṅ da spés, masànd dla gint. Ma la sò pèla la dvénta piàn piàṅ vècia listés.